बेल्जियमको इयू टी-२० लिगमा लागि जेबी ब्रुजेजले नेपाली राष्ट्रिय टोलीका उपकप्तान तथा अलराउन्डर दीपेन्द्रसिंह ऐरीलाई ड्राफ्टअघि नै टोलीमा अनुबन्ध गरेको छ।
जेबीले दीपेन्द्रलाई तेस्रो विदेशी खेलाडीको रुपमा भित्र्याएको हो। यसअघि न्युजिल्यान्डका कलिन मनरोलाई टोलीले पहिलो सिजनका लागि भित्र्याएको थियो।
जेबीले दक्षिण अफ्रिकाका ब्याटर सी भान डर डुसेनलाई पनिभित्र्याएको थियो।
जेबी ब्रजेज नेपाल प्रिमियर लिग (एनपिएल) टोली जनकपुर बोल्ट्स (जेबी) को लगानीकर्ता कम्पनी ड्रिम स्पोर्ट्सको स्वामित्वमा रहेको टोली हो।
इयू टी-२० लिग बेल्जियमको पहिलो फ्रेन्चाइज क्रिकेट लिग हो। बेल्जियन क्रिकेट फेडरेसनले डेस्टिनो लिजेन्ड्स स्पोर्ट्स एलएलसीसँग साझेदारी गर्दै आयोजना गर्न लागेको लिग आगामी जुन ६ देखि १४ जुनसम्म आयोजना हुनेछ।
नेपाली खेलाडीलाई प्राथमिकता दिने उद्देश्यले बेल्जियमको लिगमा लगानी गरेको ड्रिम स्पोर्ट्सले पहिलो सिजनमा १० लाख डलरसम्म खर्च हुने अनुमान गरेको छ।
एक वर्षअघि घोषणा गरिएको लिगमा बेल्जियमका प्रमुख शहरहरू प्रतिनिधित्व गर्ने ६ फ्रेन्चाइज टिमहरूले राउन्ड-रोबिन लिग चरण खेल्छन्, त्यसपछि शीर्ष चार टिमहरूले प्लेअफमा प्रतिस्पर्धा गर्छन्।
सहभागी टोलीमा जेबी ब्रुजेजसहित आन्थ्रोप एङकर्स, ब्रसेल्स, हेन्ट, लुभेन र लिइज रेड लायन्स छन्। यता आन्थ्रोपको स्वामित्व भारतका पूर्व राष्ट्रिय खेलाडी जाहिर खानले लिएका छन्।
प्रत्येक टिममा १८ खेलाडी हुनेछन्। जसमा कम्तीमा ४ खेलाडी बेल्जियन (सुरुवाती-११ कम्तीमा २ जना अनिवार्य), ४ खेलाडी एसोसिएट टोलीका, ४ खेलाडी पूर्ण सदस्य टोलीका सक्रिय खेलाडी र ६ जना ‘भेट्रान’ (अनुभवी पूर्ण सदस्य राष्ट्रका खेलाडी, जसले पछिल्लो २ वर्षमा अन्तर्राष्ट्रिय क्रिकेट खेलेका छैनन्) हुने बताइएको छ।
इंग्ल्यान्डका पूर्वकप्तान इयोन मोर्गन ग्लोबल ब्रान्ड एम्बेसडर छन्।अन्तर्राष्ट्रियस्तरका इंग्ल्यान्डका जेम्स भिन्स र एलेक्स हेल्ससहित श्रीलंकाका एन्जेलो म्याथ्यूज र वानिन्दु हसरंगा जस्ता खेलाडी लिग खेल्ने बताइएको छ।
लिगका लागि ड्राफ्टबाट पनि खेलाडी छनोट गरिनेछ। ड्राफ्ट २४ मार्चमा हुनेछ। ब्रसेल्समा हुने ड्राफ्टबाट सबै टिमले खेलाडी कोटा पूरा गर्नेछन्। ड्राफ्टअघि टिमहरूले केही खेलाडी भित्र्याएका हुन्।
ड्राफ्टमा नेपालका १५ बढी खेलाडी दर्ता भएको बताइएको छ।
-1746009348.jpg)
