सरकारले बिदाको दिनमा पनि बजार अनुगमनलाई निरन्तरता दिने भएको छ।
चाडपर्वलाई मध्यनजर गरेर बिदाका दिन पनि बजार अनुगमनलाई निरन्तरता दिन निर्देशन दिइएको गृह मन्त्रालयका प्रवक्ता रामकृष्ण सुवेदीले जानकारी दिए।
‘हामीले बिदाका दिन पनि अनुगमनलाई निरन्तरता दिन सबै निकायलाई निर्देशन दिएका छौं’, प्रवक्ता सुवेदीले भने।
राष्ट्रिय चाडपर्वका बेला यात्रुहरूलाई आवागमन, सुपथ मूल्यमा गुणस्तर खाद्यान्न र शान्ति व्यवस्था कायम गर्न मत्रालयले केन्द्रिय निकाय एवम् जिल्ला प्रशासन कार्यालयहरूमा २४ सै घण्टा परिचालन हुन निर्देशन दिएको मन्त्रालयले निकालेको प्रेस विज्ञप्तीमा उल्लेख छ।
नियमित बजार अनुगमन तथा निरीक्षण भइरहने, यात्रामा सहजिकरण गर्न सुरक्षा निकायहरूबाट सहायत कक्ष स्थापना गर्ने, निर्वाध सवारी साधनको आवागमनको लागि भौतिक पूर्वाधार तथा यातायात मन्त्रालय र ट्राफिक प्रहरीको समन्वय र सहयोगमा देशका विभिन्न ठाउँमा आवश्यक हेभी यन्त्रहरू समेत तैनाथ गर्ने व्यवस्था मिलाइएको मन्त्रालयले जानकारी दिएको छ।
मन्त्रालयले उपभोक्तालाई कुनै समस्या भएमा, ठगी भएको र कानूनविपरीतको कार्य भए प्रहरीलाई खबर गर्न विज्ञप्तीमार्फत आग्रह गरेका छन् ।
‘उपभोक्तालाई केही गुनासो भएमा देशैभरि प्रहरीको १००, उपत्यकाको १०३, सशस्त्र प्रहरीको १११४ नम्बरमा फोन गरेर जानकारी गराउन सकिने छ’, विज्ञप्तीमा भनिएको छ।
उपभोक्तालाई बढी मूल्य लिने, गुणस्तरहीन सामान बिक्री गर्ने, कृत्रिम अभाव सिर्जना गरी कालोबजारी गर्नेलाई कानूनअनुसार कारबाही गर्ने मन्त्रालयले बताएको छ।