नेपाल कम्युनिभर्सिटीले काठमाडौं विश्वविद्यालयसँगको सहकार्यमा ‘सामाजिक नवप्रवर्तन तथा उद्यमशीलता’ (एमएसआईई) विषयको स्नातकोत्तर कार्यक्रम औपचारिक रूपमा सुरु गरेको छ।
कार्यक्रमको बिहीबार काठमाडौंमा उद्घाटन गरिएको हो।
नेपाल कम्युनिभर्सिटीका अनुसार सन् २०२६ अक्टोबरदेखि सुरु हुने उक्त कार्यक्रममा विभिन्न शैक्षिक पृष्ठभूमिका ३० जना विद्यार्थी सहभागी हुनेछन्।
‘समुदाय नै पाठ्यक्रम’ र ‘अनुभवजन्य सिकाइ’ को अवधारणामा आधारित कार्यक्रमअन्तर्गत विद्यार्थीहरूले मुस्ताङ, चित्लाङ र जनकपुरमा प्रत्यक्ष समुदायसँग काम गर्दै अध्ययन गर्नेछन्।
अन्तिम चरणमा काठमाडौंमा क्यापस्टोन सेमेस्टर सञ्चालन गरिनेछ।
कार्यक्रममा उद्यमशीलता, सामाजिक विज्ञान र प्रविधिलाई सामाजिक कल्याणसँग जोड्ने अन्तरविषयगत दृष्टिकोण अपनाइएको विश्वविद्यालयले जनाएको छ।
उद्घाटन कार्यक्रममा नेपाल कम्युनिभर्सिटीका अध्यक्ष नरोत्तम अर्यालले स्थानीय रूपमा जरा गाडेको तर विश्वस्तरमा सक्षम शिक्षा निर्माण गर्ने लक्ष्य रहेको बताए।
काठमाडौं विश्वविद्यालयका कला संकायका डिन उद्वव प्याकुरेलले कार्यक्रमले विद्यार्थीलाई समुदायमा आधारित समाधान विकास गर्न सहयोग गर्ने विश्वास व्यक्त गरे।
कार्यक्रमका प्रमुख वक्ता उत्तमबाबु श्रेष्ठले नयाँ पुस्तालाई समुदाय, प्रकृति र गाउँसँग जोडिएको उद्यमशील सोच विकास गर्न आग्रह गरे।
विश्वविद्यालयले एमएसआईई कार्यक्रमका लागि आवेदन प्रक्रिया खुला भएको जनाएको छ।
