रहरले होइन
मजबुरीले मजदुर भएका हुन्
मानबहादुरहरू पनि
प्लास्टिकको कन्टेनरमा
प्लास्टिक नै सिलो खोज्दा खोज्दै
तिनले पसिनाको प्रशान्त महासागर बगाइसके
र ,त
त्यही नुनिलो महासागरमा
नौका बिहार गर्दै
हिप हिप हुर्रेको नारासहित
आज मजदुर दिवस मनाउँन पाएका छन्
नवधनाढ्यहरुले
मान बहादुरको पनि
सपना देख्ने आँखाहरु छन्
मान बहादुरको पनि
माया साँच्ने मुटुहरु छन्
ऊसंग पनि औसत मान्छेका झैं
अभाव छ्न् , अनिकाल छ्न्
कहिल्यै नअघाउने रित्ता थाल छ्न्
तिनै थालहरु ठटाएर
सिम्हदरबार अगाडि
भोक हड्ताल बस्न सक्दैन ऊ
किनकि
उसलाई थाहा छ
दरबार ,सरकार र खुकुरीको धार दुरुस्त एउटै हुन्
ऊ बोरा बोकेर बिद्रोह बोल्न सक्दैन
ऊजस्तै दौतरी बटुलेर टायर पोल्न पनि सक्दैन
एक हुल सुकिलाहरुले
उसकै अघिल्तिर उसकै जयगान गाइरहँदा
एक कप रातो चिया नपत्याएको पोल खोल्न पनि सक्दैन
न घुर्क्याउन सक्छ,
न दङ्ग्याउन सक्छ
न त ढुङ्ग्रामा हालेर
कुकुरको पुच्छर बङग्याउन नै सक्छ ।
हो
मान बहादुर र मान बहादुरहरु
विवश छ्न् , लाचार छन्
त्यसैले उनीहरुले पनि
सुकिलाहरुको कोटको फेरो समाएर
उनीहरुकै नारा र इशारामा
भर्खरै मे दिवस मनाएका छन्
अनि
आज बेलुकाका लागि राशन पानी कमाएका छन्
मान बहादुरहरु आज यति बिघ्न खुशी छन् कि
अर्को साल पनि पक्कै मे दिवस आउनेछ
र
उनीहरुको भागमा फेरि एक फाँको खुशी ल्याउनेछ
मजदुर दिवस जिन्दावाद !
.jpg)
.jpg)
-1756794700.JPG)
-1746009348.jpg)
