यो रहर पनि कस्तो-कस्तो
पानीको फोकाजस्तो
जहाँ पनि उठिदिने
जहिले पनि उठिदिने
अनि निमेष भरमा फुटिदिने
यो रहर पनि कस्तो-कस्तो
हावाको झोकाजस्तो
एक्कासी आउँछ
मनमा लड्डु फुटाउँछ
के-के सपना देखाउँछ
झुटको रोटी सेकाउँछ
यो रहर पनि कस्तो-कस्तो
दूधको नौनीजस्तो
अलिकति गरम के भो
पग्लेर गैगो
हिजो कसैको कविता के पढेको थिएँ
कवि बन्ने रहर लाग्यो
अस्ती नेता ज्युलाई भेटेको थिएँ
मलाई पनि नेता बन्ने रहर जाग्यो
विचार नीति सिद्धान्त होइन रहेछ
पैसा पो बलवान भएछ
जहाँ पनि पैसा नै चाहिने सबै माग्छन् मनी मनी
नसक्ने पो भए म छाडिदिन्छु अब नेता बन्ने रहर पनि
यो रहर पनि कस्तो-कस्तो
गरिबको पसिना जत्तिकै सस्तो
यो रहर पनि कस्तो-कस्तो
तरुनीको श्रृङगारजस्तो
टाढाबाट हेर्दा कति राम्रो
नजिकै पुग्दा झुत्रे झाम्रो
पैसा कमाउने रहर पनि कति साह्रो
सबैलाई धन मात्रै प्यारो
नेता, अभिनेता, व्यापारी माग्ने
सबैमा अनौठो रहर जाग्ने
मुल्लाह, काजी, पादरी, जोगी
सबका सब स्वार्थी भोगी
एउटा खुट्टा कबरमा
तर पनि शान्ति छैन मनमा
जीवनभरि कति कमायो
सबै मोजमस्ती भोगविलासमा गुमायो
आज ऊ एउटा जिउँदो लास
अझ पनि कत्रो-कत्रो आश
घिटी-घिटी गर्दैछ सास
तर पनि अझै जिउने आश
यो रहर पनि कस्तो-कस्तो
नेता ज्युको आश्वासनभन्दा पनि सस्तो
कहिल्यै पूरा गर्नै नपर्ने
जति ठूला कुरा गरे पनि काम त गर्नै नपर्ने
यो रहर पनि कस्तो-कस्तो
मानिसको जीवन जत्तिकै सस्तो
साँच्चै हाम्रो रहर पनि कस्तो-कस्तो
समुन्द्रको छालजस्तो
तर पनि रहरै रहरमा बाँचेको छु
मुटुमाथि ढुङ्गा राखी हाँसेको छु
मानिसको रहर पनि कस्तो-कस्तो
आफै भगवान बन्न पाए पनि हुन्थ्यो जस्तो
ओहो! हाम्रो सोच पनि कस्तो-कस्तो
जीवनको अन्तिम सत्य पनि नबुझेजस्तो
यही सत्य हो मर्नैपर्छ एकदिन
तर पनि अमरत्वको रहर लाग्छ छिनछिन
मान्छेको रहर पनि कस्तो-कस्तो
स्वार्थै स्वार्थमा रुमलिएजस्तो
साँच्चै यो रहर पनि कस्तो-कस्तो
माग्नेको कटौराजस्तो
जति दिए पनि सधैँ खाली
जिन्दगी यस्तै हो सबैले बजाऊ ताली।
-1746009348.jpg)
