महरालाई तीन दिन हिरासतमा राख्न अदालतले दियो अनुमति

सेतोपाटी संवाददाता

काठमाडौं, असोज २८

काठमाडौं जिल्ला अदालतले संसद सचिवालयकी कर्मचारीलाई बलात्कार गर्न खोजेको आरोप लागेका निवर्तमान सभामुख कृष्णबहादुर महरालाई अझै तीन दिन हिरासतमा राख्ने अनुमति दिएको छ।

जिल्ला न्यायाधीश दीपककुमार दाहालको इजलासले सरकारी वकिल र महराका वकिलहरूको बहस सुनेपछि यस्तो अनुमति दिएको जिल्ला अदालत काठमाडौंका सूचना अधिकारी ज्ञानेन्द्र कार्कीले सेतोपाटीलाई बताए।

सरकारी वकिल कार्यालयले पक्राउ परेको दिनदेखि लागू हुने गरी १३ दिन हिरासतमा राखेर महराबारे अनुसन्धान गर्न अनुमति दिन माग गरेको थियो। महरा दस दिन हिरासतमा बसिसकेका छन्।

महरा बिरामी भएकोले उनको बयान लिन नसकिएको र बयान लगायतका अनुसन्धानका लागि अझै तीन दिन हिरासतमा राख्नुपर्ने सरकारी वकिल उमाकान्त पौडेलले बहसका क्रममा भनेका थिए।

वरिष्ठ अधिवक्ता रमण श्रेष्ठ र अधिवक्ता मुरारी सापकोटा लगायतले महरालाई रिहा गर्नुपर्ने माग गर्दै बहस गरेका थिए।

दसैं बिदा परेकोले आज मात्र उनलाई अदालत उपस्थित गराइएको हो।

यो तीन दिनमा पनि बयान नसकिए फेरि म्याद थपका लागि महरालाई अदालतमा उपस्थित गराइने छ।

उनलाई अदालतबाट सिधै नर्भिक अस्पताल लगिएको प्रहरीले जनाएको छ। स्वास्थ्यमा समस्या आएपछि उपचारका लागि उनलाई गत असोज २३ थापाथलीस्थित नर्भिक इन्टरनेशनल अस्पताल भर्ना गरिएको थियो।

यता प्रहरीले महराविरूद्ध बलात्कार गर्न खोजेको आरोप लगाएकी कर्मचारीको कोठाबाट बरामद भएका महराका चस्मा, जुत्ताको तलुवा लगायतका सामग्री परीक्षणका लागि फरेन्सिक ल्याबमा पठाएको छ। ल्याबको रिपोर्ट भने आउन बाँकी छ।

असोज १२ गते आइतबार महरा रक्सीको बोतल बोकेर पीडित रोशनी शाहीको तीनकुनेस्थित डेरामा पुगेका थिए। त्यो रातको घटनाको भोलिपल्ट शाहीले मिडियालाई महराले आफूलाई बलात्कार र हातपात गरेको बताएकी थिइन्।

भोलिपल्ट उनको अनुहार र जिउमा चोटपटक देखिएको थियो।

प्रहरी उच्च स्रोतका अनुसार सो घटना भएको राति प्रहरी उनको डेरामा पुगेपछि पनि उनले महराले आफूलाई बलात्कार गर्ने प्रयास गरेको र शारीरिक हिंसा गरेको बताएकी थिइन्।

शाहीको मध्य रातको त्यो बयान पनि प्रहरीले रेकर्ड गरेर राखेको थियो।

घटना भएको पर्सी पल्ट असोज १४ गते प्रहरीले शाहीको डेरामा गएर महराले ल्याएका रक्सीको बोतल, घम्साघम्सीमा भाँचिएको महराको चस्माको खुट्टा र कोठाबाट हतारमा निस्किँदा छुटेको जुत्ताको तलुवालगायत सामान प्रहरीले बरामद गरेको थियो।

चौतर्फी आलोचना भएपछि महराले सभामुखको पदबाट राजीनामा दिएका थिए तर सांसदको पदबाट भने राजीनामा दिएनन्।

आफूलाई बलात्कार गर्न प्रयास गरेको र त्यसको प्रतिवाद गर्दा आफूमाथि हिंसा गरेको भन्दै पीडित रोशनी शाहीले प्रहरीमा उजुरी दिएकी थिइन्। सोही उजुरीको आधारमा प्रहरीले महरालाई असोज १९ गते पक्राउ गरेको थियो।

पक्राउ परेसँगै उनले सांसदको हैसियत गुमाएका छन् भने सेवासुविधा पनि रोक्का भएको छ।