स्याङ्जाको फेदीखोला गाउँपालिकाले माध्यमिक शिक्षा परीक्षा (एसइई )मा सहभागी हुन परीक्षा केन्द्र नजिक बसेका विद्यार्थीलाई घरघर पुर्याइदिन सुरु गरेको छ।
यसका लागि गाउँपालिकाले बिहीबार बिहानदेखि निःशुल्क बस सेवा सञ्चालन गरी विद्यार्थीलाई घरघर पुर्याइदिन थालेको गाउँपालिकाका अध्यक्ष घनश्याम सुवेदीले जानकारी दिए।
कोभिड–१९को जोखिमलाई ध्यान दिँदै सरकारले बुधबार साँझ आजदेखि सुरु हुने भनिएको सो परीक्षा स्थगन गर्ने निर्णय गरेको थियो।
फेदीखोला र खड्केटारी बजारमा बसेका फेदीखोला गाउँपालिका–५ बागे मैदान मावि र ४ गलेम शीतला माविका विद्यार्थीलाई आज बिहानदेखि घर पुर्याउन यातायातको व्यवस्था गरिएको उनले बताए।
यसपटकको सो परीक्षामा देशभर कूल चार लाख ८२ हजार ७०७ विद्याथी सहभागी हुने जनाइएको थियो।
प्रकाशित मिति: बिहिबार, चैत ६, २०७६, ०१:२७:००
