प्रधानमन्त्री केपी शर्मा ओलीले कलेजो प्रत्यारोपणका लागि सरकारले सहयोग गर्ने प्रतिबद्धता जनाएका छन्।
उनले कलेजो प्रत्यारोपणका लागि सरकारले कसरी सहयोग गर्न सक्छ भनेर खाका तयार पार्न समेत भनेको त्रिवि शिक्षण अस्पतालका कलेजो प्रत्यारोपण सर्जन प्राध्यापक डा.रमेश सिंह भण्डारीले बताए।
'प्रधानमन्त्रीज्यूले कलेजो प्रत्यारोपणका लागि सहयाेग गर्न सरकार तयार छ भन्नुभएको छ, त्यसका लागि प्रस्ताव समेत माग्नुभएको छ' उनले भने, 'हामीले अब यसको लागि प्रस्ताव तयार पार्छौँ। कलेजो प्रत्यारोपणमा धेरै खर्च लाग्छ। त्यसमा सरकारले केही सहयोग गरेमा पनि बिरामीलाई ठूलो राहत मिल्छ।'
त्रिबि शिक्षण अस्पताल महाराजगंजमा अहिलेसम्म ४ जनाको कलेजो प्रत्यारोपण भएको छ। कलेजो प्रत्यारोपणका लागि २५ लाख रुपैयाँको हाराहारीमा खर्च हुन्छ। मिर्गाैला प्रत्यारोपणका लागि भने सरकारले ५ लाख रुपैयाँ सहयोग गर्दै आएको छ।