नेकपा एमालेका वरिष्ठ नेता माधवकुमार नेपालले पार्टी अध्यक्ष केपी शर्मा ओली पक्षका सांसद नारदमुनी रानालाई संसदीय समितिबाट 'निस्केर जान' निर्देशन दिएको विषयले संसदमा प्रवेश पाएको छ।
एमालेको ओली पक्षकी सांसद गंगा चौधरीले 'फरक विचार राख्दैमा निस्केर जा' भन्नु अधिनायकतावादी चरित्र भएको टिप्पणी गरेकी छन्।
चौधरीले भनिन्, 'एउटा बराबर हैसियतको सांसदलाई निस्केर जा भन्ने, त्यहाँ त सबैको एउटै हैसियत हैन र! अन्तर्राष्ट्रिय सम्बन्ध समितिमा अधिनायकतावादी चरित्र प्रदर्शन भयो।'
साउन १० गते नेकपा एमालेका वरिष्ठ नेता नेपाल र सांसद रानाबीच भनाभन भएको थियो।
रानाले प्रतिनिधि सभा विघटनमा पुर्याउन नेता नेपाल पनि जिम्मेवार भएको टिप्पणी गरेका थिए।
उनले प्रधानमन्त्री ओलीलाई विश्वासको मत दिने नेता नेपाल अनुपस्थित भएको विषयमा कटाक्ष गरेका थिए।
जवाफमा नेता नेपालले रानालाई 'प्रतिगमनको मतियार, राजीनामा दिएर बाहिर जानुहोस्', भनेका थिए।
उक्त घटनालाई थारुप्रतिको अपमानको रूपमा चौधरीले प्रतिनिधिसभाको बैठकमा व्याख्या गरेकी छन्।
हेर्नुहोस् भिडिओ -