ललितपुर महानगरपालिकाले जिल्लाको एकान्तकुना र नख्खु क्षेत्रमा गरेको वान वे प्रहरीले हटाएको छ।
बढ्दो सवारी चापलाई ध्यानमा राखेर ललितपुर महानगरपालिकाले साउन १० गतेबाट नख्खुपुलबाट गायत्री पेट्रोलपम्प हुँदै एकान्तकुनातर्फ आउने र भनिमण्डल चोकबाट नख्खुचोकतर्फ जाने चार पाङ्ग्रे सवारीसाधनलाई वान वे गरेको थियो।
नेपाल प्रहरीका आइजिपी धिरज प्रताप सिंहकै निर्देशनमा वान वेलाई हटाइदिएको उच्च स्रोतले सेतोपाटीलाई बतायो। ‘आइजिपीको आदेशले हटाएको हो। वान वे ट्राफिक प्रहरीले गर्ने हो नि। महानगरले गर्ने सान्दर्भिक भएन,’ स्रोतले भन्यो, ‘ट्राफिक पुलिस र शान्ति सुरक्षाको पाटो नेपाल प्रहरीले हेर्ने हो। अहिले तत्काल महानगरले हेर्ने भनेर हुन्न नि। त्यसको लागि नेपाल सरकारले निर्णय गर्नुपर्यो। समन्वय पनि गर्नुपर्यो, एकलौटी ढंगले धान्नै नसकिनेगरी काम गर्नुभएन।’
‘हामीसँग समन्वय नगरी वान वे गरेको भएकाले आइजी सापको निर्देशनमा त्यहाँको वान वे हटाएका हौं,’ ती अधिकारीले भने।
महानगरपालिकाका मेयर चिरीबाबु महर्जनका अनुसार बढ्दो सवारी चाप नियन्त्रणका लागि आफूहरूले उक्त सडक वान वे बनाए पनि के कति कारणले प्रहरीले हटाएको हो त्यसबारे जानकारी नभएको सेतोपाटीलाई जानकारी दिए।
‘बढ्दो ट्राफिक जाम नियन्त्रणका लागि हामीले उक्त क्षेत्रमा वान वे गरेका थियौं। आज प्रहरीले हटाएछ, के कारणले हटाएको हो चित्तबुझ्दो कारण दिनुपर्यो,’ मेयर महर्जनले भने।
उक्त क्षेत्रमा सडक वानवे बनाएसँगै सवारी जाम पूर्ण रूपमा नियन्त्रणमा आएको दाबी गर्दै मेयर महर्जनले यसरी वान वे बनाउँदा के कस्तो असर पर्यो र हटाउनुपर्यो भन्दै आक्रोश पोखे।
‘उक्त सडक वान वे बनाएपछि सवारी व्यवस्थापन र दुर्घटना न्यूनिकरण भएको छ। सानो सडक भएकाले सवारी जाम हटाउन हामीले एकतर्फी गरेका थियौं, किन हटाइयो जानकारी माग्छु,’ उनले भने।
आफूहरूले ट्राफिक विज्ञ, स्थानीयबासी तथा वडा र सरोकारवालाको सुझाव अनुसार एकान्तकुना क्षेत्रमा सवारी आवागमन सहज बनाउन नख्खुपुलबाट गायत्री पेट्रोलपम्प हुँदै एकान्तकुनातर्फ आउने २ सय ७९ मिटर र भनिमण्डल चोकबाट नख्खुचोकतर्फ आउन २५२ मिटर क्षेत्र एकतर्फी गरिएको मेयर मर्जनले जानकारी दिए।
यसैबीच आजै मात्र आफूले महानगरीय ट्राफिक प्रहरी महाशाखाका प्रमुख मिरा चौधरीसँग कुरा गरेको मेयर महर्जनले बताए।
‘उक्त क्षेत्रमा वान वे गरेर के नराम्रो भयो भन्ने मेरो प्रश्न हो, हावाको भरमा हामीले त्यस्तो गरेको होइन। नराम्रो भएको प्रमाण दिएमा हामी प्रहरीलाई सहयोग नै गर्छौं,’ उनले भने।
वान वे गराउनुअघि नख्खु दोबाटोबाट प्रति मिनेट ४ वटा चार पाङ्ग्रे सवारी गुड्ने गरेका थिए। यस्तै भैंसेपाटीबाट नख्खु दोबाटोतर्फ प्रतिमिनेट ७ वटा सवारी आउने/जाने गर्छन्। यसले गर्दा पिक आवर जहिल्यै सवारी जाम हुने ललितपुर महानगरका नगर प्रहरी प्रमुख सिताराम हाथेछुले जानकारी दिए।
‘बढ्दो सवारी चाप र हुनसक्ने सम्भावित दुर्घटना रोक्न हामीले उक्त सडक एकतर्फी बनाइएका थियौं, के कारणले हटाइयो थाहा भएन,’ उनले भने।
हाथेछुले यो सडकबाट वान वे हटाएसँगै अब फेरि सवारी जाम हुने भन्दै चिन्ता व्यक्त गरे।
महानगरले यसअघि झम्सिखेल, पाटनढोका, पाटन क्षेत्र वान वे बनाइसकेको छ।