गुड फ्राइडे सिनेमा
बहराइनको मनामामा हुर्केकी, नृत्यंगना एक युवतीको बिहे अत्यन्तै परम्परावादी र पितृसत्तात्मक सोचले बाँधिएको भारतीय परिवारका एक शिक्षकसँग हुन्छ।
विवाहपछिका सुरूआती दिन सामान्यजस्तै लाग्छन्। नयाँ सम्बन्ध, नयाँ घर र नयाँ भूमिकासँगै वैवाहिक जीवन सहजै अघि बढ्ला भन्ने अपेक्षा उनमा पनि हुन्छ। तर त्यो सहजता धेरै समय टिक्दैन।
घरभित्रको 'चलन' छिट्टै प्रस्ट हुन्छ।
सो घरमा महिलाको स्थान र भूमिका भान्से, घरको हेरचाहकर्ता, सरसफाइकर्मी र पुरूषहरूको स्याहारमा सीमित हुन्छ। पितृसत्ता यति गहिरो छ कि, सासूले आराम गरिरहेका ससुरालाई दाँत माझ्ने ब्रस हातमै पुर्याइदिन्छिन्। चप्पल पुछेर खुट्टा अगाडि राखिदिन्छिन्। उनलाई जे मनपर्छ, घरमा त्यही मात्र पाक्छ।
खाना पहिले पुरूषले खान्छन्। महिलाहरूले कसरी र के खान्छन् भन्ने कसैलाई चासो हुँदन। पत्नीहरूको आवश्यकता सधैं पुरूषको सुविधा र आरामभन्दा तल राखिन्छ।
नयाँ बुहारी सुरूमा त आफूलाई परिस्थितिसँग मिलाउन खोज्छिन्। विरोधभन्दा सम्झौता रोज्छिन्। तर सासू सात महिनाकी गर्भवती छोरीको स्याहारका लागि बाहिर गएपछि घरको सम्पूर्ण काम उनकै काँधमा थोपरिन्छ।
यहीबीच श्रीमानको व्यवहार झन् चिसिँदै जान्छ। उनी भावनात्मक रूपमा उपेक्षित हुन्छिन्। यौन सम्बन्धका बेला पीडा हुने र केही पूर्वतयारी आवश्यक पर्ने कुरा राख्दा उनलाई 'सबै कुरा जान्ने' जस्तो व्यवहार गरेको आरोप लगाइन्छ।
घरभित्रको नियन्त्रण यतिमै सीमित रहँदैन। ससुराले रोजगारी खोज्नसमेत रोक लगाउँछन्। घरमा महिला हुनु नै परिवारको समृद्धिको प्रतीक भएको तर्क अघि सारिन्छ। महिनावारीका बेला देखाइने व्यवहारले उनी झन् स्तब्ध हुन्छिन्।
घरभित्रका यिनै साना–ठूला अन्यायहरूले एक दिन विस्फोट ल्याउँछ।
ती युवतीले अब के गर्लिन्?
यसका लागि हेर्नुस् मलयालम फिल्म 'द ग्रेट इन्डियन किचेन'।
सन् २०२१ को यो फिल्म सिनेमा हलमा लागेको थिएन। ओटिटी रिलिज गरिएको यो फिल्मको समीक्षकहरूले धेरै प्रशंसा गरेका थिए। पछि यही नाममा यो फिल्म तमिल भाषामा बन्यो। अनि 'मिसेस' नाममा हिन्दीमा पनि बन्यो।
यी सबै भाषामा बनेका फिल्मले समीक्षक र दर्शकबाट प्रशंसा पाएका थिए।
हेर्नुस् युट्युबमाः
-1746009348.jpg)
