नागरिक बचाउ दलका संरक्षक दुर्गा प्रसाईंले आफ्ना माग पूरा नभए जनविद्रोह हुने चेतावनी दिएका छन्।
सोमबार सिंहदरबारमा प्रधानमन्त्री सुशीला कार्कीसँगको भेटपछि उनले आफूहरूले राखेका माग पूरा नभए जनविद्रोह हुने र त्यो कसैले नसोचेको हुने चेतावनी दिएका हुन्।
प्रधानमन्त्री कार्कीले आफूहरूका मागबारे अध्ययन गरेर सरकारले पुस २ गते निर्णय दिने बताएको पनि प्रसाईंले जानकारी दिए।
'सबै कुरा अध्ययन गरेर, म छलफल गर्छु र पुसको २ गते निर्णय दिन्छु। तपाईंहरूले भनेको जस्तै निर्णय दिन्छु भन्नुभएको छ,' प्रधानमन्त्रीसँग गरेको कुराकानी उदृत गर्दै प्रसाईंले भने।
यस्तै, प्रधानमन्त्रीलाई सरकारले तोकेको फागुन २१ गतेको प्रतिनिधि सभा सदस्य निर्वाचन समयमा नहुने हुँदा चुनाव हुने आश नगर्न भनेको बताए।
'उहाँलाई व्यवस्था ठिक छैन, जनमत संग्रहमा जाऔँ, यो व्यवस्था ठिक छ की छैन थाहा हुन्छ भनेर भनेको छु। उहाँले सही डिसिजन दिनुभएन भने चुनाव हुँदैन,’ प्रसाईंले भने।
२०६२- ०६३ को जनआन्दोलनको म्याण्डेट भनेको संघीयता, धर्मनिरपेक्षता ल्याउने नरहेको भन्दै यसबारे जनमतसंग्रह गर्नुपर्ने माग राखेको उनले बताए।
-1746009348.jpg)
