काठमाडौंको भृकुटीमण्डपमा जारी नेकपा एमालेको ११औं महाधिवेशनको बन्द सत्र दिउँसो ३ बजेका लागि सरेको छ।
सुरूमा १२ बजे हुने भनिएको बन्द सत्र पछि १ बजेलाई सरेको थियो। त्यसपछि ३ बजेलाई सारिएको प्रचार विभाग प्रमुख राजेन्द्र गौतमले बताए।
केन्द्रीय कमिटीको अन्तिम बैठक निर्धारित ९ बजे सुरू हुन नसकेपछि बन्द सत्र पछाडि धकेलिएको हो।
अहिले केन्द्रीय कमिटी बैठक सम्पन्न भइसकेको छ, जसले पार्टीको पुरानै विधान कायम राखेर अघि बढ्ने निर्णय गरेको छ।
निर्णयअनुसार बन्द सत्रबाट अध्यक्ष १ जना, उपाध्यक्ष ५ जना, महासचिव १ जना, उपमहासचिव ३ जना र सचिव ९ जनासहित ३ सय १ सदस्यीय केन्द्रीय कमिटी गठन हुनेछ। पोलिटब्युरो ९९ सदस्यीय बनाइनेछ भने पोलिटब्युरोको एकतिहाइ संख्यामा स्थायी कमिटी गठन गरिनेछ।
बन्द सत्र सुरू हुन बाँकी समयमा महाधिवेशन प्रतिनिधि तथा नेताहरू आपसी कुराकानी र सामूहिक फोटो खिचिरहेको दृश्य भृकुटीमण्डपमा देखिएको छ।
प्रचार विभाग प्रमुख गौतमका अनुसार प्रतिनिधिहरूले खाना खाएपछि बन्द सत्र सुरू गरिनेछ। महाधिवेशनमा २२६२ जना प्रतिनिधि सहभागी छन्।
-1763886130.jpeg)
-1746009348.jpg)
