नेपाल प्रिमियर लिग (एनपिएल) अन्तर्गत शनिबार विराटनगर किंग्स र सुदूरपश्चिम रोयल्सबीचको खेल जति मैदानमा रोमाञ्चक बन्यो, त्यसभन्दा बढी मैदानबाहिर विवाद र अन्योलमा बित्यो।
निर्धारित समयभन्दा चार घण्टाभन्दा बढी ढिलो सुरु भएको खेलमा अन्ततः विराटनगरले ३५ रनको जित निकाल्यो। तर, यो खेलले नेपाल क्रिकेट संघ (क्यान) को नियम कार्यान्वयन र फ्रेन्चाइज टोलीको जिम्मेवारीमाथि समेत प्रश्न उठाएको छ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा विराटनगर र सुदूरपश्चिमबीच साँझ ५ बजे खेल हुने तालिका थियो। त्यसका लागि ४:३० बजे टस हुनुपर्ने थियो। तर, शुक्रबारदेखि काठमाडौंमा भएको वर्षाले मैदानको आउटफिल्ड हिलाम्मे बनेको थियो। मिडिया बक्स र भिआइपी बस्ने स्थानको बीचबाट वर्षाको पानी भेल बनेर मैदानमा पसेको थियो। माटोसहितको पानी मैदानमा जम्मा भएपछि पिच र आउटफिल्डको कभरलाई समेत असर गरेको थियो।
तर मैदानलाई खेल्नयोग्य बनाउन ग्राउन्ड स्टाफले लगातार मिहिनेत गरिरहेका थिए। ५:३० बजेसम्म पनि खेल सुरु हुन नसकेपछि ओभर घट्ने निश्चित भएको थियो। त्यसपछि कम्तीमा पाँच ओभरको खेल गराउने तयारी सुरु भयो।
श्रीलंकाका म्याच रेफ्री वेन्डेल ल्याब्रोयले साँझ ६:४० बजे मैदान निरीक्षण गरेका थिए। त्यसपछि साँझ ७:२५ बजे टस र ७:४१ बजे पाँच ओभरको खेल सुरु गर्ने समय निर्धारण गरिएको थियो। इनिङ्स ब्रेक १० मिनेटको राखिएको थियो।
क्यानको प्राविधिक समितिका संयोजक तथा केन्द्रीय सदस्य करण महतरा क्षेत्रीका अनुसार दुवै टोलीका कप्तान र अफिसियल मैदानको अवस्था तथा खेलको स्वरूपबारे सुरुमा सहमत थिए।
म्याच अफिसरले दुवै टोलीका कप्तानलाई बोलाएर मैदानको अवस्थाबारे जानकारी गराएका थिए। कम्तीमा १० ओभरको खेल गराउने योजनासहित पिच र मैदानको परीक्षण गरिएको थियो। पछि समय घर्किएसँगै पाँच ओभरमा खेलाउने निर्णय भएको थियो।
तर, टस गर्ने समयमा परिस्थिति बदलियो। विराटनगरका कप्तान सन्दीप लामिछाने टसका लागि तयार भएर मैदानमा पुगे पनि सुदूरपश्चिमका कप्तान दीपेन्द्रसिंह ऐरी उपस्थित भएनन्। ऐरीसहित सुदूरपश्चिमका खेलाडी मैदानबाट बाहिरिएका थिए।
मैदानमा उपस्थित एक अफिसियलले सेतोपाटीलाई दिएको जानकारीअनुसार सुरुमा खेल्न तयार भएको सुदूरपश्चिमले पछि फ्लडलाइटको अवस्था, विदेशी खेलाडीको असहमति र चोटपटकको जोखिमलाई कारण देखाएको थियो। सुदूरपश्चिमका प्रशिक्षक मिस्बाह उल हक पनि खेल गराउन नहुने पक्षमा देखिएको ती अफिसियलको दाबी थियो।
यता, क्यानका प्राविधिक संयोजक क्षेत्रीका अनुसार सुदूरपश्चिमले शीत (ड्यु) र खेलाडीको सुरक्षालाई लिएर हिचकिचाहट देखाएको थियो। प्रत्यक्ष प्रसारण सुरु भइसकेको र हजारौँ दर्शक मैदानमा प्रतीक्षारत रहेकाले क्यानका पदाधिकारीले खेल गराउन पहल गरेका थिए।
दुई अंक दिन सकिने नियम, तर क्यानको प्राथमिकता खेल गराउनु
नियमअनुसार म्याच अफिसरले मैदान खेल्नयोग्य घोषणा गरिसकेपछि कुनै टोली खेल्न उपस्थित नभएमा विपक्षी टोलीलाई दुई अंक दिन सकिने व्यवस्था रहेको प्राविधिक संयोजक क्षेत्रीले बताएका छन्। त्यसअनुसार विराटनगरले खेल नखेली पनि दुई अंक पाउन सक्ने अवस्था थियो।
तर, क्यानले तत्काल नियम कार्यान्वयन गरेर खेल टुंग्याउनुभन्दा दर्शकका लागि खेल गराउने प्रयासलाई प्राथमिकता दियो। क्यान सचिव पारस खड्का प्रत्यक्ष रूपमा सुदूरपश्चिमका पदाधिकारीसँगको छलफलमा जोडिएका थिए। लामो छलफल र सम्झाइबुझाइपछि सुदूरपश्चिम खेल्न तयार भएको थियो।
क्षेत्रीका अनुसार प्रतिकूल मौसमका बाबजुद सबै टिकट बिक्री भइसकेका थिए। दर्शकको ठूलो उपस्थिति रहेकाले आयोजकले जसरी पनि खेल गराउने प्रयास गरेको थियो।
अर्कोतर्फ दुई खेल हुने दिनमा एउटा खेल कम्तीमा पाँच ओभर भए पनि सञ्चालन भएको अवस्थामा टिकटको रकम फिर्ता गर्नुपर्ने अवस्था थियो।
यद्यपि, आगामी दिनमा यस्ता परिस्थितिमा फ्रेन्चाइज टोलीले अनावश्यक ढिलाइ वा आनाकानी गरे कडाइका साथ नियम लागू गर्ने र आर्थिक जरिवानासमेत गर्ने विषयमा छलफल भइरहेको क्षेत्रीले जानकारी दिए।
चिसो र हिलाम्मे मैदानमा दर्शकको हुटिङ
साँझदेखि नै त्रिवि मैदानमा हजारौँ दर्शक खेलको प्रतीक्षामा थिए। वर्षा र चिसोको बेवास्ता गर्दै मैदान पुगेका कतिपय दर्शकले जुत्ता हातमा बोकेर समेत खेलको प्रतीक्षा गरेका थिए। खेल सुरु हुन नसकेपछि दर्शकमा अन्योल बढेको थियो। केही दर्शकले खेल गराउनुपर्ने माग गर्दै नारासमेत लगाएका थिए।
मैदानमा दर्शकको उपस्थिति, प्रत्यक्ष प्रसारण र खेलप्रतिको चासोले पनि क्यानलाई खेल गराउन दबाब परेको थियो। राति ९ बजे टस भएपछि बल्ल खेल हुने निश्चित भयो। त्यसको २० मिनेटपछि राति ९:२० बजे पाँच ओभरको खेल सुरु भयो।
सन्दीपको जवाफ– पाँच, सात, १५ वा २० ओभर, मैदानमै खेलेर नतिजा निकाल्नुपर्छ
खेलपछि विराटनगरका कप्तान सन्दीप लामिछानेले पनि मैदानमा उत्रिएरै नतिजा निकाल्नुपर्ने आफ्नो टोलीको मानसिकता रहेको बताए।
'चाहे पाँच, सात, १५ वा २० ओभरको खेल होस्, हामीले मैदानमै खेलेर नतिजा निकाल्नुपर्छ,' उनले भने।
सन्दीपले विराटनगरसँग १० नम्बरसम्म ब्याटिङ गर्न सक्ने क्षमता रहेकाले परिस्थितिअनुसार १०० भन्दा बढी रन बनाउने लक्ष्य राखिएको बताए। टस हार्नु दुर्भाग्यपूर्ण भए पनि खेलाडीले मैदानमा मेहनत र चरित्र देखाएको उनको भनाइ थियो।
'म कर्ममा विश्वास गर्छु। भाग्यमा जे हुनु छ, त्यो भएरै छाड्छ,' उनले भने।
उनले प्रतिकूल मौसममा पनि मैदान पुगेर समर्थन गर्ने दर्शक र खेल सञ्चालनका लागि मिहिनेत गर्ने ग्राउन्ड स्टाफको सम्मानका लागि खेल्नु आफ्नो दायित्व भएको बताए। आफूले आफ्नो नियन्त्रणमा रहेका कुरामा मात्रै ध्यान दिने र बाहिरी परिस्थितिलाई नियन्त्रण गर्न नसकिने उनको भनाइ थियो।
सन्दीपले जित वा हार जे भए पनि टोलीको ड्रेसिङ रुममा सकारात्मक वातावरण रहने बताए। व्यक्तिगत प्रदर्शनभन्दा टोलीको जित महत्त्वपूर्ण हुने उल्लेख गर्दै उनले आफू वा अन्य खेलाडीले राम्रो प्रदर्शन गरे पनि टोलीले जित्न नसके त्यसको खुसी नहुने बताए।
