नेपाल राष्ट्र बैंकका गभर्नर डा. विश्व पौडेलका विषयमा जेनजी प्रतिनिधिहरू बीचमै मतान्तर देखिएको छ।
जेन–जी युनाइटेडका संयोजक जनक परियारले गभर्नर पौडेललाई बर्खास्त गर्नुपर्ने माग राख्दै आइतबार अर्थमन्त्री रामेश्वर खनाललाई ज्ञापनपत्र बुझाए।
त्यसलगत्तै जेनजी युवा तनुजा पाण्डेले सामाजिक सञ्जालमार्फत् गभर्नर पौडेलको राजीनामा माग्नुलाई 'बालहठ' र 'अपरिपक्व' भनेकी छन्।
अर्थमन्त्री खनाललाई बुझाइएको ज्ञापनपत्रमा राष्ट्र बैंक ऐन लत्याउँदै तत्कालीन सरकारले पौडेललाई गभर्नर नियुक्त गरेको दाबी गरिएको छ। तत्कालीन सरकारले गठन गरेको सिफारिस समितिले अख्तियारी दुरूपयोग गर्दै पौडेललाई सिफारिस गरेको पनि ज्ञापनपत्रमा उल्लेख छ।
यसविपरीत जेनजी युवा पाण्डेले आफ्नो सामाजिक सञ्जाल 'एक्स' मा गभर्नर पौडेललाई उत्कृष्ट अर्थशास्त्री र क्षमतावान गभर्नर भनेकी छन्।
उनले आधारहीन ढंगले कसैको राजीनामा माग्ने कार्य बन्द गर्न आह्वान पनि गरेकी छन्।
'निःसन्देह उहाँ नेपालका उत्कृष्ट अर्थशास्त्री, स्पष्टता र सन्दर्भ बुझ्ने क्षमता भएका गभर्नर हुनुहुन्छ। व्यक्तिगत मुड-स्वीङ र संकीर्ण स्वार्थले देश अझै बढी नोक्सान व्यहोर्न सक्दैन। आधारहीन राजीनामा मागहरू बन्द हुनुपर्छ,' पाण्डेले लेखेकी छन्।
-1763886130.jpeg)
-1746009348.jpg)
