नेकपा एमालेको जारी ११औं महाधिवेशनमा सचिवको उम्मेदवारी दिएका महेश बस्नेतले केपी ओलीलाई नेतृत्वमा चुनौती दिएर ईश्वर पोखरेलले 'आफ्नो रिटायरमेन्ट असहज' बनाएको बताएका छन्।
ओली पक्षबाटै सचिवमा उम्मेदवारी दिएका पोलिटब्युरो सदस्य बस्नेतले महाधिवेशन स्थल भृकुटीमण्डपमा पत्रकारहरूसँग कुरा गर्दै पोखरेल समूहलाई सहमतिमा ल्याउन अन्तिम समयसम्म कोसिस भए पनि अब त्यो सम्भावना झिनो बन्दै गएको बताए।
'अध्यक्षज्यूले बन्द सत्रमा पनि सहमतिको प्रयास गर्नुभयो। अध्यक्षलाई हटाएर समस्या समाधान हुन्छ भन्ने मान्यता गलत हो भन्दै बरू वरिष्ठ उपाध्यक्ष राख्ने भए राखौं, उपाध्यक्षको संख्या नै थप दुइटा राख्ने भए पनि राखौं भनेर सहमतिको प्रयास गर्नुभएको थियो, तर कुरा मिलेन,' उनले भने।
बस्नेतले नेतृत्वमा ओलीलाई चुनौती दिएर वरिष्ठ उपाध्यक्ष ईश्वर पोखरेलले आफ्नो राजनीतिक 'रिटायरमेन्ट' लाई असहज बनाएको टिप्पणी गरे।
'युवराज ज्ञवाली, अष्टलक्ष्मी शाक्य, मुकुन्द न्यौपाने, केशव बडालले आफ्नो जीवनको उत्तरार्द्धमा शानदार ढंगले अघि बढ्छु, ग्रासरूट स्तरमा गएर काम गर्छु भन्नुभयो। ईश्वर कमरेड पनि बरू वरिष्ठ उपाध्यक्षमा दोहोरिनुभएको भए हुन्थ्यो,' बस्नेतले भने, 'उहाँको उम्मेदवारीले पार्टीभित्र अन्तरद्वन्द्व बढ्ने हो कि भन्ने शंका छ।'
नेतृत्वमा चुनौती दिए पनि पोखरेल समूहसँग तलदेखि नै गुट बनाएर अघि बढ्ने सामर्थ्य नभएको उनले बताए।
'माधव नेपाल, झलनाथ खनाल जस्तो तलदेखि नै गुट बनाउने सामर्थ्य ईश्वर पोखरेलको समूहसँग छ भन्ने लाग्दैन,' उनले भने।
ओलीले राष्ट्रियताको अडान लिएको, सार्वभौमसत्ता जोगाउन र विकासको अभियान चलाउन भूमिका खेलेकोमा चौतर्फी हमला भइरहेको उल्लेख गर्दै त्यही हमला चिर्न उनलाई नै नेतृत्वका रूपमा स्थापित गर्नुपर्ने बस्नेतले बताए।
'यो आन्दोलन केपी ओलीको नेतृत्वमा मात्र आन्दोलन चल्छ,' उनले भने, 'मेरो निम्ति उहाँले जुन पदमा प्रस्ताव गर्नुभयो, मैले त्यही पदमा उम्मेदवारी दिएँ।'
-1746009348.jpg)
