नेकपा एमालेकी नेता पद्मा अर्यालले विभिन्न पदमा आकांक्षा राखेका नेताहरूसँग नेतृत्वको संवाद भइरहेको बताएकी छन्।
महाधिवेशनस्थल भृकुटीमण्डपमा आज पत्रकारहरूसँग कुराकानी गर्दै उनले मूल नेतृत्वदेखि केन्द्रीय सदस्यसम्म सर्वसहमति गर्ने प्रयास भइरहेको बताइन्।
प्रदीप ज्ञवाली, राजेन्द्र गौतमलगायत नेताहरूले इच्छा गरेको पदमा उम्मेदवारी दिन नपाएको सन्दर्भमा सोधिएको प्रश्नमा जबाफ दिँदै उनले भनिन्, ‘सबै आकांक्षीलाई व्यवस्थापन गर्न गाह्रो भयो। चाहनाले मात्रै भएन,आवश्यकताले हुने कुरा हो। मेरो पनि इच्छा योभन्दा माथि नै थियो होला, ठूलो पार्टीमा कार्यकर्ता व्यवस्थापन चुनौती हो। प्रदीप ज्ञवालीलगायत नेताहरूसँग नेतृत्वको संवाद भइरहेको छ।’
अध्यक्ष केपी शर्मा ओली समूहबाट ज्ञवालीलाई उपाध्यक्षमा राखिए पनि उनले महासचिव पदमा दाबी छाडेका छैनन्।
‘प्रदीप ज्ञवालीले अहिलेसम्म कुनै पनि पदमा मनोनयन गर्नुभएको सूचना आएको छैन, नेतृत्वसँग संवादमा हुनुहुन्छ,’ उनले भनिन्।
तर ज्ञवालीले केन्द्रीय सदस्य पदमा मनोनयन दर्ता गराइसकेका छन्। ज्ञवालीका स्वकीय सचिव खेमराज ज्ञवालीले केन्द्रीय सदस्य पदमा मात्रै उम्मेदवारी दर्ता भएको जानकारी दिए।
‘उहाँले केन्द्रीय सदस्यमा मात्रै उम्मेदवारी दिनुभएको छ, उपाध्यक्ष पदबारे नेतृत्वसँग संवाद भइरहेको छ,’ उनले भने।
नेता पद्मा अर्यालका अनुसार सिनियर नेताहरूलाई खुलामा उम्मेदवारी दिन भनिएको छ। सिनियर नेताहरूलाई स्थायी कमिटी सदस्य बनाउने पार्टीको चाहना छ।
-1746009348.jpg)
