नेकपा एमालेकी नेता तथा पूर्व शिक्षामन्त्री विद्या भट्टराईले आफू एउटा आवश्यकताले पार्टीमा आएको र आफूले पाउने सम्मान 'प्रशस्त पाइसकेको' बताउँदै जारी महाधिवेशनमा चुनाव नलड्ने बताएकी छन्।
'पहिलो कुरा म पार्टीमा साझा खालको मान्छे हुँ, प्यानलमा लागेर चुनाव लड्न मन लागेन। साझै हुन मन लाग्ने रहेछ,' उनले सेतोपाटीसँग भनिन्, 'दोस्रो कुरा, म एउटा आवश्यकताले पार्टीमा आएको थिएँ। मैले पार्टीबाट पाउने मर्यादा, सम्मान पाइसकेको छु। अब नयाँ साथीहरू आउनुहुन्छ। त्यसैले पनि अब चुनाव नलड्ने निधोमा पुगेको हुँ।'
एमाले नेता रविन्द्र अधिकारीको हेलिकप्टर दुर्घटनामा निधन भएपछि उनी उपनिर्वाचनमार्फत एमाले राजनीतिमा फर्किएकी थिइन्। प्राज्ञिक काममा लागेकी उनी त्यस बेला उपनिर्वाचन जितेर प्रतिनिधिसभामा आएकी थिइन्। २०७९ को निर्वाचनमा पनि उनी कास्कीबाट विजेता बनेकी थिइन्।
केपी ओली प्रधानमन्त्री छँदा उनकै असहयोग खेपेकी उनलाई महाधिवेशनमा ईश्वर पोखरेल पक्षले सचिवमा उठाउने प्रस्ताव गरेको थियो। तर उनले उक्त प्रस्ताव अस्वीकार गरेकी थिइन्।
अब प्रतिनिधिसभा चुनाव पनि नलड्ने निधोमा पुग्नुभएको हो भन्ने सेतोपाटीको प्रश्नमा भट्टराईले भनिन्, 'हाम्रो पार्टीमा त्यसबारे छलफल हुन बाँकी छ। तर मैले चुनाव पनि दुई पटकभन्दा बढी लड्दिनँ भन्दै आएको छु।'
आफू अनुसन्धान र नयाँ चिन्तन प्रणाली विकासमा सक्रिय हुने उनले प्रतिक्रिया दिएकी छन्।
-1746009348.jpg)
