मधेस प्रदेशका मुख्यमन्त्री कृष्णप्रसाद यादवले सोमबार मन्त्रिपरिषद विस्तार गरेका छन्।
दुई जना मन्त्री थपेर मुख्यमन्त्रीले मन्त्रिपरिषद विस्तार गरेका हुन्। मुख्यमन्त्री यादवलाई समर्थन गरेका सात दलीय गठबन्धनको बैठकले सहमति गरे अनुसार मन्त्रिपरिषद विस्तार भएको यादवले बताएका छन्।
'सात दलीय गठबन्धनको आजै बैठक भएको थियो, त्यसैमा भएको सहमति अनुसार मन्त्रिपरिषद विस्तार भएको हो,' मुख्यमन्त्री यादवले भने।
नवनियुक्त मन्त्रीहरूलाई प्रदेश प्रमुख सुरेन्द्र लाभ कर्णले शपथ गराएका छन्।
मुख्यमन्त्री यादवले दिएको जानकारी अनुसार लोकतान्त्रिक समाजवादी पार्टी (लोसपा) बाट रानीकुमारी तिवारी शिक्षा तथा संस्कृति मन्त्री नियुक्त भएकी छन् भने माओवादीबाट जवाहरलाल कुशवाहले ऊर्जा, सिँचाइ तथा खानेपानी मन्त्रीको जिम्मा पाएका छन्।
यसअघि नै मन्त्री नियुक्त भएर जिम्मेवारीविहीन रहेका मन्त्रीहरूले पनि अब जिम्मेवारी पाएका छन्।
यसअनुसार कांग्रेसका जंगीलाल रायले स्वास्थ्य तथा जनसंख्या मन्त्रालयको जिम्मेवारी पाएका छन् भने एकीकृत समाजवादीका कनिष पटेलले उद्योग, वाणिज्य तथा पर्यटन मन्त्रालयको जिम्मेवारी पाएका छन्। जनमत पार्टीका हेशप्रसाद यादवले यसअघि नै अर्थ मन्त्रालयको जिम्मेवारी पाइसकेका छन्।
मुख्यमन्त्री यादवले पुस ४ मा प्रदेशसभाबाट विश्वासको मत लिने तयारी गरेका छन्।
-1746009348.jpg)
