प्रतिनिधिसभाको सार्वजनिक लेखा समितिमा रास्वपा सांसद खगेन्द्र सुनारले नेपाल प्रहरी र प्रहरी महानिरीक्षक दानबहादुर कार्कीविरूद्ध दिएको अभिव्यक्तिप्रति पूर्व प्रहरी संगठन प्रमुख मञ्चले गम्भीर ध्यानाकर्षण गराउँदै कडा आपत्ति जनाएको छ।
पूर्व प्रहरी महानिरीक्षक मोतिलाल बोहराको संयोजकत्वमा रहेको मञ्चले बिहीबार प्रेस विज्ञप्ति जारी गर्दै लेखा समितिको बुधबारको बैठकमा व्यक्त केही भनाइहरू संसदीय मर्यादा, पदीय गरिमा र शिष्टाचार विपरीत रहेको ठहर गरेको हो।
विज्ञप्तिमा उठाइएका मुख्य विषयहरू —
संसदीय प्राधिकारको सम्मान: मुलुकको 'मिनी संसद' का रूपमा रहेका संसदीय समितिहरूमा जनसरोकारका मुद्दामा यथेष्ट छलफल र बहस हुनु वाञ्छनीय रहेको र समितिको यो प्राधिकारलाई मञ्चले पूर्ण सम्मान गर्ने विज्ञप्तिमा स्पष्ट पारिएको छ।
तथ्यहीन र अपमानजनक अभिव्यक्तिको विरोध: अहोरात्र खटिने सुरक्षा निकाय र यसको नेतृत्वमाथि तथ्यहीन, अपमानजनक र नकारात्मक भाष्य निर्माण गर्ने प्रयास न्यायसंगत हुन नसक्ने मञ्चको भनाइ छ।
सांसदजस्तो जिम्मेवार पदमा रहेका व्यक्तिबाट व्यक्त यस्ता अमर्यादित भनाइले संसदीय व्यवस्थाकै साखमाथि प्रश्न उठ्ने जोखिम रहने चेतावनी दिइएको छ।
व्यक्ति लक्षित टिकाटिप्पणीप्रति खेद: प्रहरी नेतृत्व कानुनी प्रक्रिया, व्यावसायिक निष्ठा, विज्ञता र इमानदारीका आधारमा चयन हुने भएकाले जनप्रतिनिधिबाट निरन्तर गरिने व्यक्ति लक्षित र पूर्वाग्रहपूर्ण टिप्पणीप्रति मञ्चले खेद व्यक्त गरेको छ।
भाषाशैली सुधार गर्न आग्रह: लोकतान्त्रिक संस्थालाई बलियो बनाउन सभ्य र मर्यादित भाषाशैली आवश्यक हुने भन्दै मञ्चले सांसद सुनारलाई आफ्नो भाषाशैली र व्यवहारमा सुधार गर्न तथा पदीय गाम्भीर्य मनन गर्दै यस्ता मनोगत अभिव्यक्ति नदोहोर्याउन आग्रह गरेको छ।
सांसद सुनारले निर्वाचन प्रहरीको पोसाक खरिदमा भ्रष्टाचारको आरोप लगाउँदै आइजिपी कार्कीमाथि 'अमर्यादित' टिप्पणी गरेका थिए।
'प्रहरीको भाटा खरिदमा समेत भ्रष्टाचार हुनु दुर्भाग्यपूर्ण छ। विपन्न वर्गका छोराछोरी प्रहरीमा भर्ना भएर देशको सेवा गरिरहेका छन्, तर उनीहरूले प्रयोग गर्ने सामग्रीको खरिदमा माथिल्लो निकायबाट ब्रह्मलुट भइरहेको छ। वर्दी लगाएर वा पदमा बसेर आफूमाथिको छानबिनलाई प्रभावित पार्न पाइँदैन,' सुनारले भनेका थिए, 'सार्वजनिक खरिदमा हुने अनियमिततालाई फौजदारी अभियोगका रूपमा अगाडि बढाउनुपर्छ।'
जबाफमा महानिरीक्षक कार्कीले निष्ठापूर्ण काम गरेको मान्छेलाई लेखा समितिमा ल्याएर जे मन लाग्यो त्यही भन्ने काम गरेको भन्दै आपत्ति जनाए।
'जे मन लाग्यो त्यही भन्ने स्थान होइन होला त यो। कुनै पनि ठाउँको एउटा सामान्य मर्यादा त हुन्छ होला नि,' कार्कीले भनेका थिए।
यो पनि पढ्नुहोस्:
