अख्तियार दुरूपयोग अनुसन्धान आयोगका प्रमुख आयुक्त प्रेमकुमार राईले आफूसहित आयोगका अरू कर्मचारीलाई प्रधानमन्त्रीको सचिवालयमा थुनिएको घटनामा जबाफ दिएका छन्।
बिहीबार राज्य व्यवस्था तथा सुशासन समितिमा छलफल क्रममा सांसदहरूले सिंहदरबारमै अख्तियार प्रमुख सहितका कर्मचारीलाई ७ घन्टा थुनेर विभिन्न व्यक्तिलाई मुद्दा चलाउन प्रधानमन्त्रीको सचिवालयका मानिसहरूले दबाब दिएको विषयमा प्रश्न गरेका थिए।
जबाफमा अख्तियार प्रमुख राईले प्रधानमन्त्री बालेनले छलफल गर्न बोलाएपछि आफूहरू गएको बताए।
'पासपोर्टको विषयवस्तुमा प्रधानमन्त्रीज्यूले बोलाउनुभएको हो कि होइन भन्ने कुरा हो। छलफल गर्न बोलाउन सकिन्छ। सुझाव लिन बोलाउन सकिन्छ। त्यो विषयमा के भएको हो भनेर, तपाईंहरूले के गरिराख्नुभएको छ भनेर बोलाउन सकिन्छ,' उनले भने।
प्रधानमन्त्री बालेनले राहदानीको मुद्दा अघि बढाउने विषयलाई तीव्रता दिन भनेपछि सोही अनुसार गरिएको पनि उनले बताए।
'हामी गयौं, छलफल गर्यौं। हेरेर यसलाई लगिदिए हुन्थ्यो, तीव्रता दिइदिए हुन्थ्यो भन्नुभयो। हामीले गर्यौं। त्यसैले हामीले मुद्दा पनि लग्यौं। मुद्दा दर्ता भइसकेको छ। अभियोजन भइसकेको हुनाले वेबसाइटमै हेर्न पाइन्छ। हेरे हुन्छ। अभियोजन ठिक थियो कि थिएन, कैफियत छ कि छैन, कति छ भन्ने कुरा हेरे हुन्छ,' उनले भने।
प्रमुख आयुक्त राईले यस विषयमा आफू धेरै प्रवेश गर्न नचाहेको भन्दै अरू प्रश्नको जबाफ दिएका थिए।
समितिमा सत्तारूढ दल राष्ट्रिय स्वतन्त्र पार्टी (रास्वपा) का सांसद अमरेशकुमार सिंहले यस विषयमा प्रश्न उठाएका थिए।
उनले संवैधानिक अंग भएकाले अख्तियारमाथि कुनै किसिमको दबाब दिने हक प्रधानमन्त्री तथा मन्त्रिपरिषदको कार्यालयलाई नहुने बताएका थिए।
'अख्तियार संवैधानिक अंग हो कि प्रधानमन्त्री तथा मन्त्रिपरिषद कार्यालयको शाखा हो? स्पष्ट गरिदिनुहोस्,' उनले अख्तियारका आयुक्तहरूलाई बैठकमा भने।
उनले अख्तियारसँग प्रधानमन्त्रीको समेत छानबिन गर्ने हक भएकाले प्रधानमन्त्रीले बोलाए भन्दैमा नजान र चिठी माग गर्न आग्रह गर्नुपर्ने बताएका थिए।
'अख्तियारको मर्यादा समाप्त हुँदैछ। प्रधानमन्त्री हुँदैमा कोही राजा हुँदैन। सांसद रैती हुँदैन,' उनले भने।
यो पनिः
