कीर्तिपुरमा फूलपाती भित्र्याउन बन्द गरिएको छ।
काठमाडौं उपत्यकाका विभिन्न ठाउँहरूमा आज फूलपाती भित्र्याउने चलन छ। तर कीर्तिपुरमा भने गत वर्षदेखि फूलपाती भित्र्याउन बन्द गरिएको हो।
यस वर्ष फूलपाती भित्र्याउने जिम्मा ग: छेँ टोलले पाएको थियो तर कीर्तिपुर नगरपालिकाले आर्थिक सहयोग नगर्दा सो चलन रोकिएको छ।
फूलपाती भित्र्याउन नगरपालिकाले पुग्ने रकम नदिएको ग: छेँ टोलका स्थानीय प्रतिनिधि अष्टमान महर्जनले बताए।
'नगरपालिकाले जात्रा पर्व चलाउनका लागि दिनुपर्ने रकम दिएको छैन',महर्जनले भने,'जात्राहरू आफैंले चलाउँदै आएका छौं। पछि नसकेपछि हामीले फूलपाती भित्र्याएनौं।'
फूलपातीका लागि दुइटा बोका र अन्य पूजाका सामग्री आवश्यक पर्ने र त्यसको रकम माग्न गए भ्याट बिल माग्दा समस्या भएको उनी बताउँछन्।
‘कीर्तिपुरमा पहिले फूलपाती भित्र्याउनका लागि आवश्यक सामग्री गुठीबाट आउने गर्थ्यो। तर पछि ती सामग्री आउन रोकिएपछि आफ्नै स्रोतले पालै पालो टोल टोलबाट चलाउँदै आएको हौं। पहिल्यै देखि चलिआएको पर्वलाई रोक्न मन नभए पनि बाध्य भएपछि भित्र्याउन बन्द गरिएको हो’, अष्टमान महर्जनले सेतोपाटीलाई भने।
यस पर्वका लागि नगरपालिकाले जम्मा १५ हजार रुपैयाँ मात्रै छुट्टाएको छ।
त्यही पैसाले सबै पूजाआजाका काम गर्न अपुग हुने भएकोले बहिष्कार गरेको कीर्तिपुर नगरपालिका – २ का अध्यक्ष रमेशमान डंगोलले बताए।
