सरकारले कोरोना भाइरसको पिसिआर विधिबाट दैनिक एक हजार परीक्षण बढाउने तयारी गरेको छ। स्वास्थ्य मन्त्रालयका प्रवक्ता डा. विकास देवकोटाले नियमित प्रेस बिफ्रिङमा परीक्षण बढाउन आरएनए छुट्याउने (एक्सट्रयाक्सन) मेसिन खरिद प्रक्रिया अगाडि बढेको जानकारी दिए।
'कम्तिमा हरेक प्रदेशमा एउटा मेसिन जडान गर्ने योजनामा छौं। यसले कम्तिमा हजार बढीको परीक्षण गर्न मिल्छ,' उनले भने।
अहिले देशभर पिसिआर विधिबाट परीक्षण गर्ने २१ वटा प्रयोगशाला छन्। जसमा टेकुस्थित राष्ट्रिय जनस्वास्थ्य प्रयोगशालाले सबैभन्दा बढी दैनिक एक हजार जनाको परीक्षण गर्न सक्छ। बाँकी प्रयोगशालाहरूको दैनिक क्षमता २५० छ।
कम क्षमताका कारण अहिले प्रयोगशालाहरूमा नमूनाको चाङ लागेको छ। यही कारण सुदूरपश्चिम प्रदेशले शुक्रबार नै पाँच दिनका लागि नमूना संकलन कार्य बन्द गर्ने निर्णय गरिसकेको छ।
दैनिक नमूना 'होल्ड' हुने समस्या कम गर्न सरकारले आरएनए एक्सट्रयाक्सन मेसिन किन्ने तयारी गरेको हो। कोरोना भाइरस परीक्षण गर्न संकलन गरिएका नमूनाबाट आरएनए छुट्याउनुपर्छ। अहिले राष्ट्रिय जनस्वास्थ्य प्रयोगशालामा मात्र यो आरएनए छुट्याउने मेसिन छ।
बाँकी प्रयोगशालाहरूमा भने प्राविधिकहरूले नै आरएनए छुट्याउने काम गरिरहेका छन् जसले गर्दा बढी समय लागिरहेको छ। प्रयोगशालाका एक स्वास्थ्यकर्मीका अनुसार यो मेसिन भए अहिले भएको क्षमताभन्दा दोब्बर परीक्षण गर्न सकिन्छ।
अहिले टेकु बाहेकका प्रयोगशालाहरूको दैनिक क्षमता २५० हो। यो मेसिन भयो भने ५०० जनाको परीक्षण गर्न सकिन्छ। मन्त्रालयले सातै प्रदेशमा यो मेसिन राखे झन्डै दैनिक १५ सय बढीको परीक्षण गर्न सकिन्छ।
प्रवक्ता देवकोटाले योसँगै सोही ठाउँहरूमा नयाँ पिसिआर मेसिन थप्ने तयारी पनि रहेको बताए।
