गुठी संस्थान र खलःपुचले निर्णय नगर्दासम्म रातो मच्छिन्द्रनाथको रथ नतानिने

सेतोपाटी संवाददाता

काठमाडौं, भदाै १८

निशेधाज्ञाबीच बिहीबार तानिँदै रातो मच्छिन्द्रनाथको रथ। तस्बिर: निशा भण्डारी/सेतोपाटी

रातो मच्छिन्द्रनाथको रथ गुठी संस्थान र १९ जातीय प्रतिनिधित्वकाे खलःपुचले निर्णय नगर्दासम्म नतानिने भएको छ।

बिहीबार दिउँसो रथ तान्ने क्रममा स्थानीय र प्रहरीबीच झडप भएपछि संस्थान र खलःपुचले बैठक आह्वान गरी निर्णय गर्ने भएका हुन्।

कोरोना संक्रमणका कारण लामो समयदेखि रोकिएको रथजात्रा सुरु नभएपछि केन्द्रीय गुठी संस्थान र ललितपुर महानगरभित्रका नेवार समुदायका १९ जातीय प्रतिनिधित्व रहेकाे खलःपुचको बैठक बसेको छ।

ज्यापु समाजका युवा तथा श्रम विभाग प्रमुख किरण डंगोलले गुठी संस्थान र ललितपुर महानगरभित्रका १९ जतीय खलःपुचको बैठक बसिरहेको र साेको निर्णय अनुसार नै रथ जात्रा तानिने बताए।

रथ तान्ने जात्रा देशभरका सबै नेवार जातिको भएकाले यसलाई कुनै पनि व्यक्ति र समूहप्रति लक्षित गरेर विवाद गर्न नहुने उनले बताए।

कोभिड १९ संक्रमणको जोखिमका कारण लामो समयदेखि रोकिएको रथ तान्नका लागि बिहीबार भेला भएका स्थानीयलाई प्रहरीले हटाउन खोज्दा झडप भएको थियो।

जिल्ला प्रशासन कार्यालयले जारी गरेको निषेधाज्ञा तोड्दै केही संख्यामा स्थानीय युवाहरु रथ बिराजमान गराइएको स्थान पुल्चोकमा भेला भएका थिए।

युवाहरुले रथ बिराजमान गराइएको ठाउँबाट रथ तानेर सडकको बीचमा पुर्‍याएका थिए। सोही भीडलाई हट्न प्रहरीले आग्रह गरे पनि स्थानीयले प्रतिकार गरेका थिए। जसका कारण झडम हुन पुग्यो।

स्थानीयले नाराबाजी गर्दै प्रहरीलाई ढुंगामुडा प्रहार गर्न थालेपछि प्रहरीले पानीको फोहोरासँगै केही सेल अश्रुग्यास प्रहार गरेको थियो। झडपमा केही घाइते भएका छन्।