मौसम केही दिनयता चिसिन थालेको छ। आकाश पनि खुल्ला छ। काठमाडौं, पोखरालगायतका शहरबाट हिमाल देखिएका तस्बिरहरू सामाजिक सञ्जालमा पोष्ट भएका छन्।
शुक्रबार बिहान परमेश्वर झाले आफ्नो ट्विटरमा हिमाल देखिएका तस्बिर हाले। ती तस्बिर उनले काठमाडौं, पोखरा वा अन्य कुनै पहाडी क्षेत्रबाट खिचेका थिएनन्।
उनले सप्तरीको राजविराजबाट प्रष्ट हिमाल देखिएको तस्बिर खिचेका थिए। तस्बिरमा धानका बाला झुलेको तराई, पहाड र सेताम्य हिमाल छ्याङ्गै देखिन्छ।
राजविराज नगरपालिका वडा नम्बर १ पदरियाका झाले आफ्नो घर अगाडिबाट तस्बिर खिचेका हुन्।
झा व्यावसायीक फोटोग्राफर भने होइनन्। उनले ती तस्बिरहरू आफ्नै फोनबाट खिचेका हुन्।
उनका अनुसार राजविराजबाट हिमाल पहिले पनि देखिन्थ्यो।
‘यसपालि भने अझ बढी प्रष्ट र सुन्दर देखिएको छ,’ उनले भने।
सबै तस्बिरहरू: परमेश्वर झा।
