पछिल्लो समय राजधानीमा लागूऔषध ब्राउनसुगर बिक्री वितरण तथा कारोबारमा संलग्न समूहको ‘गिरोह’ लाई प्रहरीले पक्राउ गरेको छ।
पुस २७ गतेयता थालिएको विशेष अपरेसनमा प्रहरीले ब्राउनसुगरका कारोबारीहरू पक्राउ गरेको हो। भारतबाट ब्राउनसुगर भित्र्याएर नेपालका तल्लोदेखि उच्च वर्गका सभ्रान्तसम्म ब्राउनसुगर पुर्याउने समूह नै समातिएको प्रहरीको दाबी छ।
लागूऔषध नियन्त्रण ब्युरोका अनुसार ९ जनालाई ब्राउनसुगर, एमफेटामाइन, नगद, डलरसहित पक्राउ गरिएको छ।
‘विशेष अपरेसन’मा कारोबारीसँगै ब्राउनसुगर ५३६.५ ग्राम, एमफेटामाइन ७.५ ग्राम, लागूऔषध तौल गर्ने तराजु दुई थान, ६ लाख ७१ हजार ५०० रुपैयाँ र ६ हजार १ सय रुपैयाँ अमेरिकी डलर बरामदा भएको ब्युरोले बुधबार पत्रकार सम्मेलन गरी जानकारी दिएको छ।
ब्राउनसुगर भारतीय बजारहुँदै नेपाल तस्करी हुने गरेको छ। नेपालबाट अवैध रुपमा निकासी गरिने गाँजा, चरेस र अफिम प्रशोधन गरी भारतमा ब्राउनसुगर बन्ने गरेको छ। त्यहीँ ब्राउनसुगर नेपाली बजारमा पुन: ल्याएर महंगो मूल्यमा बिक्री गर्ने समूह सक्रिय रहेको ब्युरो प्रमुख प्रहरी वरिष्ठ उपरीक्षक दिलीपकुमार चौधरीले बताए।
‘नेपाली बजारमा मानिसहरूको अवस्था हेरेर तीन हजारदेखि १० हजारसम्म प्रतिग्राम बिक्री हुने गरेको पाइएको छ,’ एसएसपी चौधरीले भने।
ब्राउनसुगर उच्चकोटीको लागूऔषधमा पर्छ।
एमफेटामाइन (आइसिइ) लामो समयसम्म शारीरिक उत्प्रेरणा, उत्तेजना दिने लागूऔषध हो। यदाकदा खेलाडीले पनि एमफेटामाइन प्रयोग गर्ने गरेको पाइन्छ।
महंगो पर्ने भएकाले धनाढ्यहरूले यस्तो लागुऔषध प्रयोग गर्ने गरेका छन्।
नेपालमा यो लागूऔषध निकै कम मात्रामा पाइन्छ। एमफेटामाइन बर्मा तथा थाइल्याण्डबाट नेपाल भित्रिने गरेको दाबी प्रहरीको छ। त्यहाँ एमफेटामाइन लागूऔषधका प्रयोगकर्ता अत्यधिक छन्।
चौधरीका अनुसार सुरूमा पुस २७ गते इलाम माई नगरपालिका-४ घर भई हाल काठमाडौं तारकेश्वर नगरपालिका-१० मनमैजु बस्ने ३१ वर्षीय सन्दीप राई पक्राउ परेका थिए। उनको साथबाट तीन ग्राम ब्राउनसुगर बरामद भएको थियो।
उनलाई तारकेश्वर-६ बाट मोटरसाइकल र नगदसहित पक्राउ गरिएको थियो। उनको सम्पर्क सुत्र पत्ता लगाउँदै जाँदा इलाम माई नगरपालिका-४ घर भई तारकेश्वर-१० बस्ने ३२ वर्षीय दीपक राई पक्राउ परे।
उनको साथमा ४.५ ग्राम ब्राउनसुगर थियो। उनी बस्ने डेरा तारकेश्वर-६ मा तलासी लिँदा ब्राउनसुगर ६४ ग्राम र इमफेटामाइन ७.५ ग्राम र डिजिटल तराजु बरामद भएको थियो।
त्यसको भोलिपल्टै इलाम नगरपालिका २ का ३६ वर्षीय केसाङ योल्मु काठमाडौं-२६ मित्रनगरबाट पक्राउ परे। उनको साथबाट चार सय ग्राम ब्राउनसुगर बरामद भएको एसएसपी चौधरीले बताए।
यस्तै, मनाङ डिस्याङ गाउँपालिका-३ घर भई हाल स्वयम्भू बस्ने ४६ वर्षीय टासी सन्डुप गुरूङ छन्। उनी लागूऔषध खरिदका गर्ने क्रममा तराजु र २ लाख ६० हजार नगदसहित कोटेश्वरबाट पक्राउ परेका थिए।
यस्तै, पुस २९ गते माछापुच्छ्रे बैंक फिदिमबाट प्रहरीले लागूऔषधको कारोबारको चार लाख ६० हजार रुपैयाँसहित फालेलुङ गाउँपालिका-८ का ५५ वर्षीय भीमप्रसाद लोवालाई पक्राउ गरिएको ब्युरोले जनाएको छ। उनलाई सन्दीप राईले कारोबारको रकम बैंकमा पठाएका थिए।
सोही पैसा झिक्ने क्रममा लोवालाई पक्राउ गरिएको ब्युरोले जनायो।
२९ गते नै झापा बुद्धशान्ति गाउँपालिका-३ बाट प्रहरीले ४१ वर्षीय दिनेश कुमाल र ४३ वर्षीय सन्तोष सापकोटालाई पक्राउ गरेको छ। कुमालको साथबाट पाँच ग्राम र सापकोटाबाट १० ग्राम ब्राउनसुगर बरामद भएको थियो।
माघ १ गते भद्रपुर-१० घर भई हाल काठमाडौं कुमारीस्थान बस्ने ४१ वर्षीय राजेश श्रेष्ठलाई प्रहरीले पक्राउ गरेको छ। कोटेश्वरबाट पक्राउ परेका उनको डेरामा तलासी लिँदा ३ लाख ३७ हजार ५०० रुपैयाँ र अमेरिकी डलर ६ हजार १ सय बरामद भएको थियो।
ब्राउनसुगर खरिदका लागि उनले रकम राखेको दाबी प्रहरीको छ। यस्तै, गोकर्णेश्वर नगरपालिका-६ नारायणटार सडक किनारबाट इलाम जोगमाई नगरपालिका-३ घर भएका ३६ वर्षीय सोनाम कागते पक्राउ परेका छन्। माघ २ गते पक्राउ परेका उनको साथबाट ५० ग्राम ब्राउनसुगर फेला परेको थियो।
पक्राउ परेकामध्ये केसाङ, कुमाल, सापकोटा, कागते मुख्य कारोबारी रहेको प्रहरीको दाबी छ। हाल बरामद ब्राउनसुगर अहिलेसम्मकै उच्च परिमाणमा भएको दाबी ब्युरोको छ।
एसएसपी चौधरीका अनुसार लकडाउनमा कारोबार ठप्प थियो। लकडाउन खुलेपछि विस्तारै सिमावर्ती क्षेत्रबाट ब्राउनसुगर भित्रिन थालेको हो।
ब्राउनसुगर नेपालमा निम्नदेखि, मध्यम, युवा र उच्च वर्गका सभ्रान्तहरूले प्रयोग गर्ने गरेको दाबी ब्युरोको छ। पक्राउ परेकाहरूले क-कसलाई ब्राउनसुगर बेच्थे भन्नेबारे अनुसन्धान थालिएको र त्यसबाट प्रयोगकर्ताहरू फेला पर्ने एसएसपी चौधरीले बताए।
-1746009348.jpg)
