भक्तपुरको मध्यपुर थिमि नगरपालिका–८, बोडेमा एक जना पूर्व शिक्षकले हजारौं पुस्तक राखेर निजी पुस्तकालय खोलेका छन्।
ज्ञान बाँडे धर्म हुन्छ भनेर स्थानीय सजीव था श्रेष्ठले ‘जन्मभूमि बोडे पुस्तकालय’ खोलेर निःशुल्क अध्ययन गर्ने वातावरण मिलाएका हुन्।
पुस्तकालयमा साहित्य, संगीत, कला, कम्प्युटर, अर्थतन्त्र, अध्यात्म र जीवनदर्शनका १० हजार भन्दा बढी पुस्तक छन्। घरको दोस्रो तला पुस्तकले भरिएको छ। त्यहाँको एउटा कोठामा बसेर पढ्ने सुविधा छ।
वि.सं २०७५ माघ १२ गते खोलिएको पुस्तकालयको रेखदेख श्रेष्ठ आफैंले गर्दै आएका छन्। कोरोना भाइरसका कारण निषेधाज्ञा सुरु हुनु अगाडिसम्म उनको पुस्तकालय हरेक दिन दिउँसो २ बजेदेखि अपरान्ह ५ बजेसम्म सर्बसाधारणका लागि खुल्थ्यो। निषेधाज्ञा भएसँगै पुस्तकालय बन्द छ।
‘निषेधाज्ञा हटेपछि पुस्तकालय फेरि सञ्चालनमा आउनेछ’, ६५ वर्षे श्रेष्ठले सेतोपाटीसँग भने।
विद्यार्थी र कर्मचारीलाई पढ्न सजिलो होस् भनेर उनले शनिबार पनि पुस्तकालय खोल्दै आएका थिए। बरू हप्तामा एक दिन बुधबार उनको पुस्तकालय बन्द हुन्थ्यो।
उनी पूर्व शिक्षक हुन्। उनले काठमाडौंको टोखास्थित सरस्वती माविमा वि.सं २०३४ देखि २०७३ साल कात्तिकसम्म शिक्षा दान गरेका थिए। विद्यालयबाट रिटायर्ड भएको केही वर्षपछि पुस्तकालय सञ्चालनमा ल्याएका। उनलाई परिवारको भरपुर सहयोग छ।
श्रेष्ठ अध्ययनशील छन्। उनको पुस्तकालयमा नेपाली र अंग्रेजी भाषामा लेखिएका पुस्तक संग्रहित छन्।
‘सानै उमेरदेखि नै अध्ययनमा रुचि बढ्दै गयो। किताबहरू किन्ने र पढ्ने गर्दै गएँ’, आफूसँग भएका किताबहरूबाट अरुले पनि ज्ञान लिन सकूँन् भन्ने उनलाई लाग्यो, ‘पुस्तकालय खोलेपछि पनि थुप्रै किताब किनिसकेको छु।’
पुस्तकालयमा आउने शुभेच्छुकले पुस्तक दान गर्ने गरेको उनले सुनाए।
एक्लैले सधैं पुस्तकालय सम्हाल्न सकिँदैन। यसलाई सार्वजनिक पुस्तकालयमा रुपान्तरण गर्ने उनको चाहना छ। निषेधाज्ञा खुलेपछि पुस्तकालय दर्ता गरेर नगरपालिकालाई घच्घच्याउने उनले बताए।
‘हाम्रा मेयर मदनसुन्दर श्रेष्ठ पनि पुस्तकालय हेर्न आउनु भएको थियो’, उनले सम्झिए, ‘हाम्रो नगरपालिकाले पुस्तकालय भवन बनाउन जग्गा व्यवस्था मिलाएमा सबै पुस्तक दान गर्छु भनेको छु।’
यस पुस्तकालयमा नेपाली र अंग्रेजी भाषामा लेखिएका सबै किसिमका शिक्षावद्र्धक पुस्तक दान गर्न पनि सकिनेछ।
सम्पर्क
सजिव था श्रेष्ठ–९८६०७६३९७४
जन्मभूमि बोडे पुस्तकालय
मध्यपुर थिमि, भक्तपुर
1622796676.jpg)
-1746009348.jpg)
