जलवायु परिवर्तनले कृषि उत्पादनमा देखिएको समस्या र यसका समाधानका उपायबारे किसानलाई पर्याप्त जानकारी दिनुपर्ने विज्ञहरूले बताएका छन्।
यसका लागि स्थानीय सरकारहरूले महत्वपूर्ण भूमिका खेल्नुपर्ने जलवायु परिवर्तन र कृषिका विज्ञहरूले बताएका छन्।
किसानले दुःख गरेअनुसार कृषि उत्पादन भइरहेको छैन।
सामुदायिक सूचना नेटवर्क (सिआइएन) को १३ औं वार्षिकोत्सवमा अवसरमा आज आयोजित जलवायु परिवर्तन र कृषि विषयक अन्तरक्रियामा विज्ञहरूले किसानहरूलाई जलवायु परिवर्तनका असर र समाधानका उपायबारे जानकारी दिनुपर्ने बताए।
जलवायु परिवर्तनले खेतीयोग्य जग्गामा असर परिरहेको र कृषि उत्पादन पनि घटिरहेको जलवायु परिवर्तनका विज्ञ मञ्जित ढकालले बताए।
किसानलाई यसको असरबारे सूचना दिनुपर्ने र त्यसको जिम्मेवारी स्थानीय सरकार तथा सामुदायिक रेडियोको भएको पनि उनले बताए।
यस्तै अर्का विज्ञ उत्तमबाबु श्रेष्ठले जलवायु परिवर्तनको असरले नयाँ-नयाँ रोग किराको प्रकोप देखिएको र त्यसको प्रभाव कृषि उत्पादनमा परेको बताए।
‘कृषिमा असर पार्ने झारको प्रकोप बढेको छ। हिमाली खर्कमा समेत त्यसको असर देखिएकाले समग्रमा कृषि उत्पादनमा प्रभाव पारेको छ,’ उनले भने।
कृषि विज्ञ तेजबहादुर सुवेदीले जलवायु परिवर्तनको असरले पारेको प्रभाव कम गर्न किसानलाई सचेत बनाउनुपर्ने बताए। कृषि उत्पादनमा पुगेको क्षति कम गर्न कृषि बिमालाई प्राथमिकतामा राख्नुपर्ने उनले बताएका छन्।
खाद्यका लागि कृषि अभियन्ता कृष्ण पौडेलले खाद्य प्रणालीमा जलवायु परिवर्तनको विषयले पारेको प्रभावका बारेमा सरकारले चासो नदिएको बताए।
कृषि विभागका महानिर्देशक रेवतिरमण पौडेलले कृषिमा जलवायु परिवर्तनले पारेको असर न्युनिकरण गर्दै किसानलाई सचेत बनाउनुपर्ने बताए।
कृषि अनुसन्धानन परिषदसँग सहकार्य गरेर जलवायु परिवर्तन अनुकूलन हुने किसिमका बीउ, तरकारी र फलफूलका बारेमा अनुसन्धान भइरहेको उनको भनाइ छ।