नक्कली भुटानी शरणार्थी प्रकरणमा आइतबार तीन जनाको बयान जारी छ।
काठमाडौं जिल्ला अदालतका न्यायाधीश प्रेमप्रसाद न्यौपानेको इजलासमा तीन जना अभियुक्तको बयान भइरहेको अदालतका सूचना अधिकारी दीपक दाहालले जानकारी दिए।
इन्द्रजित राई, टंककुमार गुरूङ र सन्दीप रायमाझीको आज बयान भइरहेको छ।
इन्द्रजित पूर्वगृहमन्त्री रामबहादुर थापा बादलका सुरक्षाविज्ञ थिए भने सन्दीप नेकपा (एमाले)का सांसद टोपबहादुर रायमाझीका छोरा हुन्।
उनीहरूको बयान सकिए अरूको पनि आजै बयान हुनसक्ने सूचना अधिकारी दाहालले बताए।
गत शुक्रबार अदालतले यस प्रकरणका मुख्य अभियुक्त केशव दुलाल र सागर राईको बयान लिएको थियो। उनीहरूको बयान सकिसकेको छ।
प्रहरीले यस प्रकरणमा १७ जनालाई पक्राउ गरेको छ। उनीहरू सबैजनाको बयान सक्न कम्तीमा पनि एक हप्ता लाग्न सक्ने जिल्ला सरकारी वकिल कार्यालय काठमाडौंका प्रमुख सहन्यायाधिवक्ता अच्युतमणि न्यौपानेले जानकारी दिए।
‘१७ जनाकै बयान लिनुपर्ने भएकाले यो हप्ताभरि बयानमात्रै हुने सम्भावना छ। बयान सकेपछि मात्रै थुनछेक बहस सुरू हुन्छ,’ उनले भने।
अभियुक्तको बयान न्यायाधीशको रोहबरमा इजलास अधिकृतले लिने गर्छ। त्यहाँ कुनै पनि पक्षका वकिल समावेश नहुने पनि न्यौपानेले बताए।
प्रहरीले पक्राउ गरेपछि पनि सरकारी वकिल कार्यालयको रोहबरमा बयान लिने गर्छन्। तर अदालतले भने पुन: बयान लिन्छ।
यसरी बयान सकेपछि थुनछेक बहस अर्को हप्ता मात्रै हुने सम्भावना छ। त्यसको लागि कम्तीमा पनि ६ जना सरकारी वकिल कार्यालय बहस गर्ने तयारी छ।
सरकारी वकिल कार्यालयका प्रमुख न्यौपानेकै नेतृत्वमा बहस गर्ने तयारी गरेको छ। यता प्रतिवादीको तर्फबाट भने क-कसले बहस गर्नेछन् भन्ने खुलिसकेको छैन।
सरकारी वकिल कार्यालय काठमाडौंले यस प्रकरणमा संगठित अपराध, ठगी, राज्यविरूद्धको कसुर, लिखत किर्ते र एकीकृत कसुरमा गत बिहीबार मुद्दा दर्ता गरेको थियो।
राई, गुरूङ र रायमाझीको बयान सकेपछि १२ जनाको बयान लिन बाँकी हुन्छ।
टोपबहादुर रायमाझी, पूर्वगृहमन्त्री बालकृष्ण खाण, उनका पिए नरेन्द्र केसी, पूर्वसभासद आङटावा शेर्पा, सानु भण्डारी, सन्देश शर्मा, शरणार्थी नेता टेकनाथ रिजाल, हज समिति अध्यक्ष शमशेर मियाँ, पूर्वगृहसचिव टेकनारायण पाण्डे, रामशरण केसी, गोविन्दकुमार चौधरी र लक्ष्मी महर्जनको बयान बाँकी छ।
प्रहरीले यस प्रकरणमा ३० जनालाई प्रतिवादी बनाएको थियो। जसमध्ये १३ जना फरार छन्।
