सुर्खेतको वीरेन्द्रनगरस्थित यरिचोक नजिक बालकलाई ठक्कर दिएको मोटरसाइकल र चालक नियन्त्रणमा लिइएको छ।
जिल्ला प्रहरी कार्यालय सुर्खेतका अनुसार गुर्भाकोट नगरपालिका-१४ गुमीका ३१ वर्षीय अर्जुन पुनलाई प्रहरीले नियन्त्रणमा लिएको हो। उनको साथबाट कर्णाली प्रदेश ०३-००२ प ९२०३ नम्बरको मोटरसाइकल पनि नियन्त्रणमा लिएको हो।
उक्त मोटरसाइकलको ठक्करबाट शनिबार आठबिस नगरपालिका-६ खिड्कीज्युलाका ५ वर्षीय दिग्दर्शन पुरीको मृत्यु भएको थियो। यरिचोक नजिकको गोकुल कटेज नजिकै उक्त मोटरसाइकलले मामाको घरबाट फुपुको घर जाँदै गरेका बालक पुरीलाई ठक्कर दिएको थियो।
ठक्करबाट घाइते भएका बालकलाई उपचारका लागि कर्णाली केयर अस्पताल लगिएको थियो। उनको उपचारका क्रममा मृत्यु भएको थियो।
घटनापछि फरार रहेका चालक र मोटरसाइकललाई शनिबार बेलुका प्रहरीले नियन्त्रणमा लिएको हो।
बालकका आफन्तहरूले पीडकलाई पक्राउ गरी कारबाही गर्नुपर्ने माग गर्दै वीरेन्द्रनगरमा आन्दोलन गरेका थिए। उनीहरूले कर्णाली राजमार्गको दैलेख खण्डमा पनि सडक अवरूद्ध गरेका थिए।
