ग्यापू अनलाइन मार्केट प्लेसका संस्थापक ज्ञानेन्द्र खड्काले आफू कांग्रेस नेता गणेश लामाबाट अपहरणमा परेको भन्दै प्रहरीमा जाहेरी दिएका छन्।
खड्काले काठमाडौं उपत्यका अपराध अनुसन्धान कार्यालयमा लामाविरूद्ध जाहेरी दिएका हुन्। खड्काले यसबारे बुधबार सामाजिक सञ्जालमार्फत् सार्वजनिक गरेका हुन्।
आफूलाई लामा र सहदेव कक्षपति लगायतले ललितपुरको ढोलाहिटीस्थित आदर्श टोलबाट अपहरण गरी सानेपास्थित एक होटलमा लगेर ८ घण्टाभन्दा बढी बन्धक बनाएको उनले आरोप लगाएका छन्।
त्यसरी उनीहरूले बन्धक बनाएर फिरौती समेत माग गरेको खड्काले सार्वजनिक गरेको विज्ञप्तिमा उल्लेख छ।
‘केही समय अगाडि २०८० साल पुस २३ गते (जनावरी ८ तारिखको) दिन, कुख्यात आपराधिक समूह गणेश लामा र सहदेव कक्षपति लगायतद्वारा ललितपुर धोलाहिटी आदर्श टोलबाट मेरो अपहरण गरी सानेपास्थित लन्डन हाउस होटलमा लगेर ८ घन्टाभन्दा बढी कोठामा थुनेर बन्धक बनाइ धम्की र त्रासबीच करकापमा फिरौती स्वरूप करोडौंको लेनदेनको कागज गरेको थियो,’ उनले लेखेका छन्।
बाटोमा गाडी छेकेर मास्क र टोपी लगाएर लामा र कक्षपतिले दिउँसो १ बजेतिर खड्काले अपहरण गरी लगेको बताएका छन्।
यसरी बन्धक बनाएर आफूबाट २५ लाख रुपैयाँ लिएको पनि उनले उल्लेख गरेका छन्। अपहरणमा परेको भन्दै उनले माघ २८ गते जाहेरी दिएका थिए।
खड्काले जाहेरी दिएको काठमाडौं उपत्यका अपराध अनुसन्धान कार्यालयका प्रवक्ता एवं एसपी रवीन्द्र रेग्मीले जानकारी दिए। यद्यपि त्यहाँबाट ललितपुरको घटना भएको भन्दै थप अनुसन्धानका लागि जिल्ला प्रहरी परिसर ललितपुरमा पठाइसकेको पनि उनले बताए।
‘जाहेरी आएको थियो। ललितपुरमा भएको घटना हुँदा हामीले हिजो परिसरमा पठाएका छौं,’ उनले भने।
परिसरका प्रमुख एसएसपी शेखर खनालले पनि एक चरणको अनुसन्धान गरी कार्यालयले थप अनुसन्धानका लागि पठाएको र त्यसमाथि काम भइरहेको जानकारी दिए। घटनाबारे आफूले हेरिनसकेको पनि उनले बताए।
जाहेरी दिएको थुप्रै दिन हुँदा पनि मान्छे पक्राउ नपरेको हुँदा मुद्दा कमजोर बनाउने पो हो कि भन्ने डरले आफूले घटना सार्वजनिक गरेको खड्काले बताएका छन्।
आफूसँग क्रिप्टो करेन्सी बिटक्वाइन हुनसक्ने आशंका गरेर लिन खोजेको पनि खड्काले बताएका छन्। मोबाइल, ल्यापटप हेरेर केही फेला नपरेपछि जबरजस्ती २० करोडको कागज समेत गराइएको उनको भनाइ छ।
‘मसँग बिटक्वाइन छ भने त्यसलाई सबै ट्रान्सफर गर्ने र त्यसपछि प्रहरीकहाँ पनि जाने हिम्मत गर्दैन भन्ने रहेछ। उनीहरूले योजनाबद्ध रूपमा मलाई अपहरण गरे,’ खड्काले भने, ‘तर मैले त बिटक्वाइनको कारोबार गरेको छैन। त्यसपछि मलाई २० करोडको कागज गराइयो। कागज गरेर छुट्ने बाहेक उपाय नै नभएपछि मैले कागज गरेँ। त्यसपछि म भारत गएको थिएँ।’
घटना भएको केही दिनसम्म पनि लामाले सम्पर्क गरी पैसा मागेकाले २५ लाख पठाएको पनि उनले बताएका छन्। त्यसबाहेक पनि थप रकम मागेका च्याटहरू रहेको उनले बताएका छन्।
‘मैले प्रहरीलाई ह्वाट्सएप च्याटहरू पनि जाहेरीसँगै उपलब्ध गराएको छु,’ उनले भने।
प्रहरीमा जाहेरी दिएपछि विभिन्न व्यक्तिमार्फत् मिलापत्र गराउन दबाब आएको पनि खड्काले बताए।
खड्काले गणेश लामासँग एक पटकमात्रै भेटेको पनि बताएका छन्। उनले कुनै साथीमार्फत् दरबारमार्गमा २०७१ सालमा भेटेका थिए।
तर उनीसँग कुनै सम्बन्ध नरहेको खड्काले प्रस्ट्याए।
विभिन्न अन्तर्वार्तामा क्रिप्टोकरेन्सी नेपालमा वैधानिकता पाउनुपर्ने बताउने गरेकाले लामासहितले आफूसँग क्रिप्टो हुनसक्ने आशंकामा अपहरण गरेको उनको दाबी छ। यद्यपि आफूले क्रिप्टोको कारोबार नगरेको उनले बताए।
