कुवेतको एक भवनमा आगलागी हुँदा कम्तिमा ४१ जनाको मृत्यु भएको छ।
बुधबार बिहान मन्गाफ जिल्लाको एक भवनमा आगलागी भएको अन्तर्राष्ट्रिय समाचार संस्था अल्जजिराले जनाएको छ। ठूलो संख्यामा विदेशी कामदारहरू रहेको उक्त भवनमा आगलागी हुँदा दर्जनौं मानिसहरू घाइते भएका छन्।
घाइतेलाई विभिन्न अस्पतालमा लगिएको छ। कुनकुन देशका मानिसहरूको ज्यान गएको छ भन्ने यकिन भइसकेको छैन।
उपप्रधानमन्त्री शेख फहाल अल-युसुफ अल-सबाहले उक्त भवनका मालिकलाई पक्राउ गर्न आदेश दिइसकेका छन्। उनले आन्तरिक तथा रक्षा मन्त्रालयसमेतको जिम्मेवारी सम्हालेका छन्।
अधिकारीहरूले आगलागीलाई नियन्त्रणमा लिइसकेका छन्। तर के कारणले आगलागी भएको हो भन्नेबारे खुलिसकेको छैन।
‘उक्त भवनमा कामदारहरू बस्थे। दर्जनौंको उद्धार भएको थियो। यद्यपि अत्यधिक धुँवाका कारण निस्सासिएर धेरै जनाले ज्यान समेत गुमाएका छन्,’ वरिष्ठ प्रहरी अधिकारीले राज्यद्वारा सञ्चालित एक टिभीसँग भनेका छन्।
उक्त भवनमा धेरैजसो भारतीय कामदार बस्ने गरेको खुलेको छ।
भारतीय विदेशमन्त्री एस जयशंकरले पनि यसबारे ट्विट गर्दै राजदूत क्याम्पतर्फ गएको र यसबारे बुझ्ने काम भइरहेको उल्लेख गरेका छन।
