झुट्टा विवरण दिएर वंशजको नागरिकता लिन खोजेको आरोपमा प्रहरीले तीन जना भारतीय नागरिकलाई पक्राउ गरेको छ।
जिल्ला प्रशासन कार्यालय काठमाडौंबाट वंशजको नागरिकता लिन खोज्ने तीन जनालाई पक्राउ गरेको जिल्ला प्रहरी परिसर काठमाडौंका एसपी नवराज अधिकारीले जानकारी दिए।
पक्राउ पर्नेमा भारत घर भई काठमाडौं-१४ बस्ने ५१ वर्षीय हरियोम गुप्ता भन्ने हरिओम कुमार, २० वर्षीय ऋषि गुप्ता र १८ वर्षीय हर्ष गुप्ता छन्।
जेठ २९ गते (मंगलबार) ऋषि र हर्षले आफूसँगै रहेर व्यापार गरी बसेका बुवा बेपत्ता भएको भन्दै नागरिकता लिन खोजेका थिए।
वडा कार्यालयबाट सिफारिस लिएर नागरिकता बनाउन मंगलबार प्रशासन कार्यालयमा पुगेको एसपी अधिकारीले बताए।
उनीहरूले नागरिकता लिन खोजेपछि प्रशासन कार्यालयले परिसरलाई पत्राचार गरेको हो। उक्त पत्राचारपछि ऋषि र हर्षसहित उनका बुवा हरिओमसमेतलाई पक्राउ गरेको थियो।
उनीहरूमाथि नागरिकता ऐन अनुसार अनुसन्धान अघि बढाएको छ। अदालतबाट पाँच दिन हिरासतमा राखेर अनुसन्धान गर्न समेत प्रहरीले अनुमति पाएको छ।