गोरखाको चुमनुब्री गाउँपालिका वडा नम्बर ७ छेकम्पारस्थित लामा गाउँका ३० वर्षीय कर्मा राप्के लामा एक वर्षपछि चिनियाँ जेलबाट छुटेर नेपाल आएका छन्।
उनी गत वर्ष वैशाख पहिलो साता चीनको तिब्बती क्षेत्रबाट प्रहरीको नियन्त्रणमा परेका थिए। यार्सागुम्बा टिप्न गएको आरोपमा उनी पक्राउ परेका थिए भने उनलाई जेलमा राखिएको थियो।
चिनियाँ अधिकारीहरूले गिरफ्तार गरी जेल सजाय दिएका कर्मा राप्के लामा अप्रिल ३० तारिखका दिन ल्हासास्थित टाप्छे चोङखाङ जेलबाट रिहा भएको गोरखा क्षेत्र नम्बर १ का प्रतिनिधि सभा सांसद राजेन्द्र बजगाईले जानकारी दिए।
उनीसँगै पक्राउ परेका छेकम्पार छुले गाउँका कर्मा छेतेन भने अझै चिनियाँ जेलमै छन्।
जेलमा रहँदा कर्मा राप्के लामाले गम्भीर स्वास्थ्य समस्याहरूको सामना गर्नुपरेको कुराकानीबाट थाहा भएको सांसद बजगाईले बताए।
‘तीन महिना सिगात्से जेलमा रहँदा उहाँलाई उपचारको सुविधा दिइएन, जसका कारण उहाँको स्वास्थ्य अवस्था अत्यन्तै खराब भएको रहेछ,’ उनले भने, ‘पछि ल्हासामा उहाँले केही उपचार पाउनुभयो।’
सांसद बजगाईले गोरखाका दुई युवा चिनियाँ जेलमा रहेको कुरा प्रतिनिधि सभाको बैठकमा पनि पटक पटक सुनाउँदै छुटाउन पहल गरिदिन सरकारको ध्यानाकर्षण गराएका थिए।
