रूपन्देहीको बुटवलमा दुई दिनदेखि बेपत्ता रहेका एक जना युवक मृत भेटिएका छन्।
तिलोत्तमा नगरपालिका वडा नम्बर २ शंकरनगरका २० वर्षीय गोपाल टण्डनको शव सोमबार बिहान फेला परेको हो।
बुटवल उपमहानगरपालिका-११ स्थित कालिकापथमा रहेको हाइटेन्सन वालभित्र उनको शव फेला परेको इलाका प्रहरी कार्यालय बुटवलका डिएसपी इन्द्रबहादुर रानाले जानकारी दिए।
उनको शव सोमबार बिहान मात्रै फेला परेको भएपनि दुर्घटना शनिबार मध्यराति २ बजेतिर भएको डिएसपी रानाले बताए।
होटल रेस्टुरेन्ट तथा क्लबहरूको संचालनसँगै बुटवलको ठमेल उपनामले चिनिन थालेको कालिकापथ सडकमा रहेको विद्युतको हाइटेन्सन वालमा ठोक्किएर उनको मृत्यु भएको खुलेको हो।
डिएसपी रानाका अनुसार शनिबार राति २ बजेतिर लु ४८ प ३१७० नम्बरको मोटरसाइकल वालमा ठोक्किएको सिसिटिभी फुटेजमा पनि देखिएको छ।
गोपाल शनिबार साँझदेखि घर नफर्किएपछि परिवारले कार्यालयमा निवेदन दिएका थिए।
सोमबार बिहान स्थानीय विद्युतको हाइटेन्सन पोलको चारैतर्फ लगाएको वालभित्र मोटरसाइकल र एक जना युवकको शव देखेपछि स्थानीयले प्रहरीलाई खबर गरेका थिए।
प्रहरी घटनास्थल गएर हेरेपछि उक्त शव शनिबार रातिदेखि सम्पर्कबिहीन भएको भनिएका गोपालको रहेको पुष्टि गरेको हो।
कालिकापथ सडकको बिचमा गाडीका विद्युतको हाइटेन्सन लाइनका लागि दुर्घटना बढेको भन्दै अहिले मोनो पोल लगाउने काम थालिएको छ। सडकको बिचमा मोनोपोलको लागि बेस तयार भइरहेका छन्।
तीव्र गतिमा रहेको मोटरसाइकल पक्की वालमा ठोक्किएपछि वाल भित्र पसेको सिसिटिभी फुटेजमा देखिएको रानाले बताए।
चारैतर्फ अग्लो गरी उठाइएका पक्की वालका कारण घटना समेत ढिलो गरी थाहा भएको उनले बताए।
प्रहरीले घटनाबारे थप अनुसन्धान अघि बढाएको छ।
