धादिङमा ८८ वर्षीय वृद्धमाथि खुकुरी प्रहार भएको छ।
बिहीबार दिउँसो १ बजेतिर निलकण्ठ नगरपालिका-९ नियालपानी बस्ने ८८ वर्षीय जगनाथ लम्सालमाथि खुकुरी प्रहार भएको जिल्ला प्रहरी कार्यालय धादिङका डिएसपी सुवास हमालले जानकारी दिए।
जगनाथमाथि सोही ठाउँमा बस्ने अन्दाजी ६० वर्षीय बाबुकाजी लम्सालले खुकुरी प्रहार गरेको आरोप छ।
बाबुकाजीले खुकुरी प्रहार गरी घाइते बनाएको खबर पछि प्रहरी निरीक्षक प्रल्हाद सिलवालको कमाण्डमा १५ जनाको टोली खटिएको थियो।
घाइते भएका जगनाथको उपचारका लागि जिल्ला अस्पताल धादिङबेशी पठाएको थियो। उनको अनुहारमा गम्भीर चोट लागेको छ। जगनाथको थप उपचारको लागि नेपाली सेनाको हेलिकप्टरमार्फत काठमाडौंको महाराजगञ्जस्थित शिक्षण अस्पतलमा पुर्याइएको छ।
प्रहरीले बाबुकाजीलाई पक्राउ गरेको छ।
प्रहरीले घटनासम्बन्धी थप अनुसन्धान अघि बढाएको छ।
