एक जना सरकारी कर्मचारीलाई 'हनी ट्र्याप'मा पारेर रकम असुली गरेको आरोपमा प्रहरीले दुई जना युवतीलाई पक्राउ गरेको छ।
काठमाडौं उपत्यका अपराध अनुसन्धान कार्यालयको टोलीले दुई जना युवतीलाई पक्राउ गरेको एसपी काजीकुमार आचार्यले जानकारी दिए।
पक्राउ पर्नेमा कैलाली घर भइ कालोपुल बस्ने ३४ वर्षीया ममता तामाङ र भक्तपुर घर भई हाँडीगाउँ बस्ने ३४ वर्षीया आँचल श्रेष्ठ छन्।
प्रहरीका अनुसार सरकारी कर्मचारी रहेका ती पीडित पुरूष एक्लै बस्छन्।
एक महिनाअघि उनलाई सामाजिक सञ्जालमा आँचलको फ्रेन्ड रिक्वेस्ट आएको थियो। उनले रिक्वेस्ट एसेप्ट गरे।
केहीबेरमै उनीहरूबीच कुराकानी सुरू हुन थाल्यो।
प्रहरीको अनुसन्धानअनुसार कुराकानी सामान्य हुँदै भेटघाट गर्नेसम्मको योजना बनेको थियो।
एक दिन त आँचलले कफी खान बोलाइन्। योजनाअनुसार काठमाडौंको सामाखुसीस्थित एक ठाउँमा उनीहरूले कफी खाएर फर्किए।
त्यसरी आँचलले पुरूष सँगको घनिष्टता बढाइरहेका थिए।
एक हप्तापछि फेरि आँचलले बोलाइन्। त्यस दिन मदिरा पिउने भनेर आँचलले एउटा होटलमा बोलाइन्।
एक होटलमा भएको भेटघाट पुरूषले आफ्नो होसै नहुने गरी मदिरा पिए। भोलिपल्ट होसमा आउँदा आँचल त्यहाँबाट हिँडिसकेकी थिइन्।
‘त्यहाँ पीडितले होस हराउने गरी मदिरा पिएछन्। भोलिपल्ट बिहान उनले होटलमा आफूलाई एक्लै पाएछन्,' अनुसन्धानमा संलग्न एक प्रहरीले भने।
त्यस दिनदेखि आँचल सम्पर्कमा आएकी थिइनन्।
तर एक हप्तापछि मेसेन्जरमा आएको तस्बिर र भिडिओले ती पुरूष झस्किए। तस्बिर र भिडिओमा उनी आँचलसँगै थिए तर नग्न अवस्थामा।
आफ्नो त्यस्तो फोटो/भिडिओ देखेपछि उनको होश उड्यो। त्यो भिडिओ र फोटो ममताले खिचेर पीडितलाई पठाएका थिए।
प्रहरीको अनुसन्धानअनुसार पीडित पुरूषलाई एक जना साथीले नै आँचलसँग सम्पर्क गराइदिएका थिए। ती साथीले पनि अर्का एक जना पुरूषमार्फत आँचलको सम्पर्क जोडिदिएका हुन्।
‘फोटो भिडिओ आएपछि पीडितले आफ्नो त्यही साथीसँग कुरा गरे। तर उनीहरूले उल्टो घर र जग्गाजमिन मागेका रहेछन्।नदिए बलात्कार कसुरमा फसाउनेसम्मको ब्याकमेलिङ गरेको पाइयो,’ एक प्रहरीले भने।
त्यसपछि मात्रै पीडित प्रहरीकहाँ पुगेका थिए।
पीडित पुरूषले आँचललाई सुरूमा पाँच लाख दिने र बाँकी पछि दिने सहमति समेत गरेको खुलेको छ।
सहमतिअनुसार पीडितले आँचललाई बुधबार चेक दिएका थिए। पछि प्रहरीले उक्त चेकसहित ममता र आँचललाई पक्राउ गरेको हो। प्रहरीले उनीहरूसँगै अरू दुई जनाको पनि खोजी गरिरहेको छ।
यो गिरोहले अरू पनि फसाएको हुनसक्ने प्रहरीको बुझाइ छ। प्रहरीले उनीहरूको बैंक स्टेटमेन्ट पनि केलाएर अनुसन्धान गरिरहेको छ।
-1742801159.jpg)
