सर्वोच्च शिखर सगरमाथा आरोहणको क्रममा रहेका नेपाली कांग्रेसका महामन्त्री विश्वप्रकाश शर्मा ‘क्याम्प थ्री’ नजिक पुगेर शुक्रबार ‘क्याम्प टु’ मै फर्किएका छन्।
सगरमाथा बेसक्याम्पबाट लियाजो अफिसर पासाङ भोटेले दिएको जानकारी अनुसार सगरमाथाको क्याम्प थ्री नजिकै पुगिसकेका महामन्त्री शर्मा एक सय मिटर अघिबाट क्याम्प टु फर्कन बाध्य भएका हुन्।
‘प्रतिकूल मौसमले उहाँलाई फर्कन बाध्य पारेको हो,’ उनले भने ‘क्याम्प फोरमा पुगिसकेको भारतीय सैनिक टोली पनि यही कारण क्याम्प टुमा फर्केको छ।’
लियाजो अफिसर भोटेका अनुसार सगरमाथाको क्याम्प टु ६ हजार ४ सय मिटरको उचाइमा छ भने क्याम्प थ्री ७ हजार २ सय मिटरको उचाइमा छ।
‘उहाँ ७ हजार १ सय मिटरको उचाइमा पुगिसक्नुभएको थियो, मौसमी प्रतिकूलताले अघि बढ्न दिएन,’ उनले भने।
उनका अनुसार केही चिनियाँ आरोहीहरू पनि बेसक्याम्प नै आइपुगेका छन् भने बिना अक्सिजन सगरमाथा चढ्ने प्रयास गरेका एक स्पेनी आरोही खराब मौसमका कारण क्याम्प टु मै फर्केका छन्।
अबको चार दिनपछि मे २७ र २८ मा आरोहणका लागि मौसम अनुकूल हुनसक्ने अनुमान आरोहीहरूको छ।
चैत महिनाको मध्यमा नै बेसक्याम्प पुगेका सयभन्दा बढी आरोही आरोहण पालो कुरेर बसेको भोटेले जानकारी दिएका थिए।
कांग्रेस महामन्त्री शर्माले बिहीबार राति क्याम्प टुबाट अघि बढ्ने निर्णय लिएका थिए। उनले अहिले सगरमाथा आरोहणको ‘सेमिफाइनल’ अर्थात् आरोहण प्रशिक्षण मात्रै लिइरहेको बताए पनि ७ हजार १ सय मिटरसम्म पुगिसकेका छन्। उनको स्वास्थ्य स्थिति राम्रो रहेको भोटेले जानकारी दिए।
-1742801159.jpg)
