सल्यानमा २३ वर्षीय युवक मृत फेला परेको घटनामा प्रहरीले तीन जनालाई पक्राउ गरी अनुसन्धान अघि बढाएको छ।
बनगाड कुपिण्डे नगरपालिका-६ का २३ वर्षीय शंकर बिसी डुडाखोल-कुवाखोलामा गत शुक्रबार मृत फेला परेका थिए।
उनी रूखमा झुण्डिएको अवस्थामा मृत फेला परेका थिए।
उनी झुण्डिएको अवस्थामा मृत फेला परे पनि प्रहरीले घटना शंकास्पद रहेको भन्दै अनुसन्धान अघि बढाएको थियो।
जिल्ला प्रहरी कार्यालयका डिएसपी केशर न्यौपानेले तीन जनालाई पक्राउ गरी अनुसन्धान अघि बढाएको बताए।
कुपिण्डे नगरपालिका-६ का २७ वर्षीय साजन बिसी, २६ वर्षीय राजु बुढा क्षत्री र २१ वर्षीय सोमराज केसीलाई प्रहरीले पक्राउ गरेको छ।
गत बिहीबार उनीहरूसँगै शंकर बिसी बनगाड कुपिण्डे-४ मा लागेको मेला हेर्न पुगेका थिए।
मेलाबाट फर्किएर उनीहरूले बजारमा मदिरा सेवन गरेको प्रहरीसँग बताएका छन्। शंकर बिसीले मोटरसाइकल चलाएर साथीलाई छोड्न गएकोसमेत उनीहरूले बताएका छन्। मध्यरातमा मोटरसाइकल दुर्घटनामा परेको उनीहरूको भनाइ छ।
यहीबीचमा घटना भएको हुन सक्ने प्रहरीको भनाइ छ। तर पक्राउ परेका तीनै जनाले घटनाबारे नबताएको डिएसपी न्यौपानेले बताए। प्रहरीले तीनै जनाविरूद्ध जिल्ला अदालतबाट म्याद थप गरिसकेको छ।
प्रहरी हाल प्राविधिक विश्लेषणमा खटिएको छ। तीनै जनाविरूद्ध ज्यानसम्बन्धी कसुरमा मुद्दा चलाउने तयारी प्रहरीको छ।
डिएसपी न्यौपानेले पोष्टमर्टम रिपोर्टले पनि घटना शंकास्पद देखाएको बताए।
झुण्डिएको घटना भएमा डेथ बाइ ह्याङ्गिङ भनेर रिपोर्ट आउने उनले बताए। तर यो घटनामा मृत्युको कारणमा ‘पेन्डिङ’ भनिएको छ। अर्थात मृत्युको यकिन कारण खुल्न बाँकी नै रहेको उनले बताए।
मृतकको भिसेरा चेक जाँचका लागि जिल्ला बाहिर पठाउने तयारी प्रहरीको छ। त्यसबाट थप कुरा खुल्नेछ।
‘झट्ट हेर्दा झुण्डिएका व्यक्ति दुर्घटनामा परेको जस्तो देखिन्थ्यो र उनी सवार मोटरसाइकल घटनामा परेको अवस्थामा फेला पनि परेको छ,’ डिएसपी न्यौपानेले भने, ‘तर दुर्घटनामा परेका व्यक्ति उपचारमा किन गएनन्, शंकास्पद छ।’
