दक्षिणी बंगालको खाडीमा औसत समयभन्दा छिट्टै आइपुगेको मनसुनी वायुको गति पछिल्ला दिनमा सुस्त देखिएको मौसमविदले बताएका छन्।
त्रिभुवन विश्वविद्यालयका जल तथा मौसम विज्ञानका सहप्राध्यापक विनोद पोखरेलले दक्षिणी बंगालको खाडीमा मनसुनको गति सुस्त देखिएकाले नेपाल भित्रने मिति अनिश्चित भएको जानकारी दिए।
भारतीय द्विप अण्डमान निकोबार आइसल्याण्ड आसपास मनसुन १६ मेमै आइपुगेको थियो। जबकि मनसुन त्यहाँ आइपुग्ने सरदर मिति २२ मे हो।
त्यसपछि १८–२२ मेमा श्रीलंकाको मध्यभागसम्म आइपुगेको मनसुनी वायु २२ तारिखसम्म बंगालको खाडीको मध्य भागसम्म आइपुगेको छ।
जबकि यहाँसम्म आइपुग्ने औसत दिन २६ मे हो।
नेपालमा साधारणतया जुन १३ मा मनसुन भित्रने अनुमान गरिन्छ। गतवर्ष सरदरभन्दा १५ दिन अगावै मनसुन नेपाल प्रवेश गरेको थियो।
यसपालि मनसुन याममा कम वर्षा र बढी गर्मीको प्रक्षेपण गरिएको छ।
तर प्रि–मनसुन याममा भने मनग्गे वर्षा भइरहेको छ। जल तथा मौसम विज्ञान विभागले अद्यावधिक गरेको विवरणअनुसार जेठ १२ गतेसम्म २८६.६० मिलिमिटर वर्षा भइसकेको छ।
विभागले फागुन १७ देखि जेठ १७ सम्मको ९१ दिनको अवधिमा नेपालमा सरदर २२६.३ मिलिमिटर वर्षा हुने अनुमान गर्छ। तर यसपटक अहिलेसम्म १२५.२ मिलिमिटर वर्षा भइसकेको छ।
नेपालमा मनसुन यामबाहेक अरू समयमा पश्चिमी वायुको दबदबा रहन्छ। मनसुनी वायुले पश्चिमी वायुलाई धकेल्दै विस्थापित भएपछि मनसुन नेपालभर भित्रने हो। यो क्रम पूरा हुन असार मध्यसम्म लाग्ने गरेको देखिएको छ।
मनसुनी वायु विकास र विस्तार भइरहे पनि नेपालमा पश्चिमी वायु सक्रिय छ।
पछिल्लो २४ घन्टामा गोरखाको आरूघाट आसपास ६८.२ मिलिमिटर वर्षा भइको थियो। लमजुङको गारेढुंगामा ४०.२, कुञ्चामा ४७.२ मिलिमिटर वर्षा भएको थियो।
बुधबार राति काठमाडौं उपत्यकामाबाहेक धेरै स्थानमा पानी परेको देखिएको छ। खास गरी गण्डकी, बागमती प्रदेशका धेरै स्थानमा मध्यम वर्षा भएको थियो।
बिहीबार अपराह्नदेखि नेपालका धेरै स्थानमा वर्षा हुने र केही ठाउँमा राति भारी वर्षाको सम्भावना रहेको मौसमविद विनोद पोखरेलले बताएका छन्।
