विस्थापित भएका तिलगंगाका स्थानीयहरू ७५ दिनदेखि पशुपति विकास कोषको कार्यालय अगाडि धर्नामा बसेका छन्।
पुस्तौंदेखि बस्दै आएको आफूहरूको पशुपति तिलगंगा क्षेत्रको बस्ती नै सरकारले भत्काएपछि न्यायको खोजीमा उनीहरू ७५ दिनदेखि धर्नामा बसेका हुन्।
उनीहरूले विगतमा भएका सम्झौता कार्यान्वयन गरी गोठाटारमा जग्गा उपलब्ध गराउन सरकारसँग माग गरेका छन्।
संघर्ष समितिका अनुसार पशुपति विकास कोषले २०५३ सालमा गुरूयोजना लागू गरेपछि २०७१ सालदेखि स्थानीयलाई स्थानान्तरण गर्ने प्रक्रिया अघि बढाइएको थियो।
त्यसक्रममा २०७१ असार १ गते तत्कालीन परिषद्को निर्णयअनुसार गोठाटारमा विकसित घडेरी उपलब्ध गराउने सहमतिमा स्थानीयले सरकारी मूल्याङ्कनअनुसार मुआब्जा बुझेका थिए।
पीडित पक्षका प्रतिनिधि सुदर्शन गौतमले सरकारले विकसित घडेरी उपलब्ध गराउने, किस्ताबन्दीमा जग्गा दिने तथा जीविकोपार्जनका लागि व्यापारिक स्थानसमेत उपलब्ध गराउने प्रतिबद्धता जनाएको भए पनि ती सहमति हालसम्म कार्यान्वयन नभएको बताए।
उनका अनुसार त्यसयता विभिन्न कार्यदल गठन भए, पटक–पटक वार्ता र सिफारिस भए पनि स्थानान्तरणसम्बन्धी दायित्व पूरा गरिएको छैन। बरू पछिल्लो समय बस्ती भत्काइएपछि स्थानीयहरू स्थायी बसोबासविहीन बनेका छन्।
‘हामी सुकुम्बासी होइनौँ, यहीँका रैथाने बासिन्दा हौँ। आफ्नै जग्गामा बसेका थियौँ। अहिले परिवारहरू छरिएका छन्, कोही आफन्तकहाँ छन्, कोही भाडामा बसेका छन्,’ गौतमले भने।
उनका अनुसार बस्ती हटाइएपछि प्रधानमन्त्री तथा मन्त्रिपरिषद्को कार्यालय, संस्कृति, पर्यटन तथा नागरिक उड्डयन मन्त्रालय र पशुपति विकास कोषसँग विभिन्न चरणमा वार्ता भएको छ।
पछिल्लो परिषद् बैठकमा पनि विस्थापितहरूको विषयमा छलफल भएको जानकारी आएको भए पनि आधिकारिक निर्णय भने प्राप्त नभएको उनले बताए।
‘हामीले सुनेअनुसार विकास कोषले आफ्नो दायित्व स्वीकार गरेको छ। तर कहिले, कसरी र कहिलेसम्ममा जग्गा उपलब्ध गराउने भन्ने स्पष्ट भएको छैन,’ उनले भने।
विस्थापितहरूले सरकारले विगतका सहमति कार्यान्वयन गरी गोठाटारमा जग्गा उपलब्ध नगराएसम्म धर्ना जारी रहने बताएका छन्।
उनीहरूले सरकारले गुरूयोजना कार्यान्वयन नगर्ने निर्णय गरे आफूहरूले लिएको मुआब्जा फिर्ता गरेर पुरानै स्थानमा फर्किन तयार रहेको पनि बताएका छन्।
‘गुरूयोजना कार्यान्वयन गर्ने हो भने सहमतिअनुसार जग्गा दिनुपर्छ। होइन भने हामीले लिएको मुआब्जा सरकारलाई फिर्ता गर्छौं र आफ्नै जग्गामा फर्किन्छौँ। यी दुईबाहेक अर्को विकल्प छैन,’ गौतमले भने।
तस्बिरहरू:
-1784197629.jpg)
-1784197629.jpg)
-1784197628.jpg)
-1784197628.jpg)
-1784197627.jpg)
-1784197627.jpg)
-1784197626.jpg)
-1784197626.jpg)
-1784197628.jpg)
-1784197627.jpg)
-1784197628.jpg)
-1784197627.jpg)
