दक्षिण कोरियामा रोजगारीका लागि रोजगार अनुमति प्रणाली (इपिएस) अन्तर्गत आवेदन दिनेहरूको चाप बढेपछि राहदानी विभागले दुई सिफ्टमा सेवा दिने भएको छ।
विभागले बुधबार एक सूचना जारी गर्दै साउन १४ देखि २२ गतेसम्म विद्युतीय राहदानीसम्बन्धी सेवा दुई सिफ्टमा सञ्चालन गरिने जनाएको छ।
पछिल्लो एक सातादेखि विशेषगरी इपिएसका लागि राहदानी बनाउने सेवाग्राहीको संख्या ह्वात्तै बढेपछि विभागले यस्तो व्यवस्था गरेको हो।
विभागका अनुसार साउन १४ देखि २२ गतेसम्म पहिलो सिफ्ट बिहान ७ बजेदेखि दिउँसो २ बजेसम्म सञ्चालन हुनेछ भने दोस्रो सिफ्ट दिउँसो २ बजेदेखि बेलुकी ९ बजेसम्म रहनेछ।
त्यस्तै, शनिबार र आइतबारसहितका सार्वजनिक बिदाका दिनमा पनि विभाग खुला रहनेछ। बिदाका दिन बिहान १० बजेदेखि बेलुकी ४ बजेसम्म विद्युतीय राहदानीसम्बन्धी सेवा प्रवाह गरिने सूचनामा उल्लेख छ।
दक्षिण कोरिया रोजगारीका लागि आवेदन दिने प्रक्रिया अघि बढाउन राहदानी अनिवार्य हुन्छ। चापलाई व्यवस्थापन गर्दै सेवाग्राहीलाई समयमै सहज रूपमा सेवा उपलब्ध गराउन अतिरिक्त समय र दुई सिफ्टको व्यवस्था गरिएको विभागले जनाएको छ।
नेपाली नागरिकलाई सहज, सरल र प्रभावकारी रूपमा सेवा उपलब्ध गराउन विभाग पूर्ण रूपमा प्रतिबद्ध रहेको समेत जनाइएको छ।
1661511346.jpeg)
