प्रेस काउन्सिलले पत्रकार किशोर श्रेष्ठको घर र जनआस्था साप्ताहिको कार्यालयमा प्रहरीले खानतलासी गरेको विषयमा गम्भीर ध्यानाकर्षण भएको जनाएको छ।
बुधबार श्रेष्ठलाई पक्राउ गरेपछि प्रहरीले उनको घरमा समेत खानतलासी गरेको थियो।
'…बुधबार राति पकाउ गरी उहाँको निजी निवास खानतलासी भएको र आज बिहानै उक्त सञ्चार माध्यमको कार्यालयमा हातहतियारसहित प्रवेश गरी कम्प्युटरलगायत सामग्री जफत गरिएको घटनाप्रति प्रेस काउन्सिल नेपालको गम्भीर ध्यानाकर्षण भएको छ,' काउन्सिलले विज्ञप्तीमा भनेको छ।
काउन्सिलले कुनै सञ्चार माध्यम तथा पत्रकारले आफ्नो व्यावसायिक आचारसंहिता उल्लंघन गरेका काउन्सिलमा उजुरी दिन सक्ने कानुनी व्यवस्था रहेको पनि स्मरण गराएको छ।
सो अनुसार काउन्सिलसँग स्वअनुगमन, मेलमिलाप, सचेत गराउने, प्रेस पास निलम्बन गर्ने वा कालोसूचीमा राख्नेसम्मका कारबाही गर्ने अधिकार रहेको विज्ञप्तीमा भनिएको छ।
त्यस्तै सञ्चारकर्मको क्रममा पत्रकार र सञ्चारकर्मीबाट प्रस्तुत हुने कार्यशैली र पेसागत मर्यादाप्रति पनि काउन्सिल उत्तिकै चिन्तित रहेको विज्ञप्तीमा उल्लेख छ।
'अतः काउन्सिलले आफ्नो क्षेत्राधिकारभित्र रहेर दुवै दृष्टिकोणबाट पत्रकार र सञ्चारमाध्यमको अनुगमन गर्दै आएको विषयलाई मध्यनजर गरी कुनै समाचारको विषयमा चित्त नबुझे काउन्सिलमा उजुरी दिन सरोकारवाला सबै पक्षमा विनम्र अनुरोध गर्दछ,' विज्ञप्तीमा भनिएको छ।
जनआस्थामा प्रकाशित समाचारबारे वैयक्तिक गोपनीयता भंग भएको भन्दै एक महिलाले उजुरी दिएपछि प्रहरीले पत्रकार श्रेष्ठलाई गएराति पक्राउ गरेको थियो।
बुधबार उनको घरमा खानतलासी लिएपछि बिहीबार बिहान जनआस्थाको कार्यालयमा पनि खानतलासी लिएर केही सिपियु जफत गरेको छ।
बिहीबार सो घटनाको विरोधमा पत्रकार महासंघले विरोध जनाउँदै जिल्ला प्रहरी परिसरअगाडि धर्ना दिएका थिए।
प्रहरीले हिरासतमा रहेका श्रेष्ठलाई वकिलसँग पनि भेट्न दिएका छैनन्।
उनलाई आजै अदालत लगेर म्याद थप गर्ने प्रहरीको तयारी छ।
हेर्नुस् काउन्सिलको विज्ञप्ती—
-1786613173.png)
