काठमाडौं आइपुगेका बंगलादेशी नागरिकको शरीरबाट पाँच दिनपछि सुन निकालिएको छ।
त्रिभुवन अन्तर्राष्ट्रिय विमानस्थलमा फ्लाइ दुबई एयरलाइन्सबाट साउन ३१ गते बिहान साढे १० बजे बंगलादेशी नागरिकले सुन निलेर ल्याएको खुलेको हो।
एसपी राजकुमार सिलवालका अनुसार ३५ वर्षीय मोहम्मद रसेल हल्दरलाई शंका लागेर नियन्त्रणमा लिँदा उनले १५० ग्राम सुन निलेर पेटमा बोकी ल्याएको स्वीकार गरेका हुन्।
उनलाई त्यसपछि काठमाडौं मेडिकल कलेज सिनामंगलमा लगेर पेल्भिक क्षेत्रको एक्सरे जाँच गराएका थिए।
उनको एक्सरेमा शंकास्पद वस्तु देखिए पनि स्वास्थ्यमा कुनै असर देखिएको थिएन।
शौच गराउँदा पनि ननिस्किएपछि उनलाई त्यही अस्पतालमा भर्ना गरिएको थियो।
पाँच दिनसम्म उपचार गरेपछि शुक्रबार उक्त सुन निकालिएको हो।
उनीमाथि अनुसन्धान गर्नका लागि त्रिभुवन अन्तर्राष्ट्रिय विमानस्थल भन्सार कार्यालय गौचरमा बुझाएको छ।
