बुधबार बिहान रसुवामा आएको बाढीले लुम्बिनी प्रदेशका ४५ जना सम्पर्कविहीन भएका छन्।
दाङ, रूकुम पूर्व, रोल्पा र प्यूठानका गरी ४५ जना सम्पर्कविहीन रहेको ती जिल्लाका प्रशासनले जनाएको छ।
सम्पर्कविहीन हुनेमा दाङका मात्रै २२ जना छन्।
बाढीमा सल्यानका पनि ४५ जना सम्पर्कविहीन रहेको सल्यान प्रशासनले जनाएको छ।
रोजगारी तथा कामको सिलसिलामा ती जिल्लामा पुगेका आफन्त सम्पर्कमा नआएपछि परिवारले प्रशासनसँग खोजी तथा उद्धारका लागि आग्रह गरेका छन्।
जिल्ला प्रशासन कार्यालय दाङका अनुसार सम्पर्कविहीन हुनेमा तुलसीपुरका कोपिला केसी र खम्बु बोहोरा छन्। उनीहरू रसुवाको स्याफ्रुबेसी स्वास्थ्य चौकीमा कार्यरत थिए।
त्यस्तै तुलसीपुरका शिवशंकर जोशी मैलुङ हाइड्रोपावरमा कार्यरत थिए।
सल्यानमा पुर्ख्यौली घर भई तुलसीपुर–९ मा बस्दै आएकी प्रमिला बुढाथोकी टिमुरे हाइड्रोपावरमा कार्यरत रहेको प्रशासनले जनाएको छ।
तुलसीपुरका शोभाराम योगी, लालबहादुर रोका, गोपीलाल रोका र नारायण अधिकारी नुवाकोटस्थित फेवा हाइड्रोपावरको सुरुङमा काम गर्दै आएका थिए। धुर्बबहादुर बुढामगर पनि कामको सिलसिलामा रसुवा र नुवाकोट पुगेका थिए।
त्यस्तै तुलसीपुर–९ का ४६ वर्षीय पूर्णबहादुर बस्नेत, घोराही–१५ भरतपुरका सूर्यबहादुर केसी, तुलसीपुर–१८ दुधरासका गोपाल परियार र विकास परियार, तुलसीपुर–१८ कै सुदन गिरी, तुलसीपुरका सीमा चौधरी, तुलसीपुर–१२ का बजारु चौधरी, तिलक चौधरी र रामकुमार चौधरी सम्पर्कविहीन रहेको विवरण सार्वजनिक गरिएको छ।
दाङका अन्य सम्पर्कविहीनमा दंगीशरण गाउँपालिका–६ का प्रेम विक, राजपुर गाउँपालिका–१ कठबेरवाका गोपाल चौधरी र बुद्धिराम चौधरी तथा पुर्ख्यौली घर रोल्पा भई दाङ बस्दै आएका राजेन्द्र महत छन्। महत त्रिशूली हाइड्रोपावरमा कार्यरत रहेको जनाइएको छ।
सल्यानका ४५ जना सम्पर्कविहीन
रसुवाको भोटेकोशीमा आएको बाढीपछि सल्यानका ४५ जना सम्पर्कविहीन रहेको जिल्ला प्रहरी कार्यालय सल्यानले जनाएको छ। उनीहरूमध्ये केही बेपत्ता छन् भने केहीको परिवारसँग सम्पर्क हुन सकेको छैन। दुई जना घाइते रहेको र अन्य दुई जना भने परिवारको सम्पर्कमा आएको प्रहरीले जनाएको छ।
जिल्ला प्रहरी कार्यालय सल्यानका प्रहरी प्रवक्ता देवराज भट्टराईका अनुसार बनगाड कुपिण्डे नगरपालिका–६ गैरीगाउँका मात्रै नौ जना र सोही वडाको गगनकटेराका दुई जना बाढीमा परी बेपत्ता भएका छन्।
गैरीगाउँमा एकै परिवारका पाँच जना सम्पर्कविहीन भएका छन्। बाढीमा परी परिवारका गिरिलाल बुढाथोकी घाइते भए पनि सम्पर्कमा छन्। उनकी श्रीमती मुनिता बुढाथोकी तथा छोराछोरी डिला, निर्मला, निराजन र केशव बुढाथोकी सम्पर्कविहीन छन्।
गैरीगाउँकै २४ वर्षीय गगन बस्नेत तथा ३६ वर्षीय चित्रबहादुर पुन, उनकी २९ वर्षीया श्रीमती पविना राना पुन र तीन वर्षीय छोरा जितेन्द्र पुन पनि सम्पर्कविहीन छन्।
गगनकटेराका २९ वर्षीय ठाकुरवीर ऐरी घाइते अवस्थामा सम्पर्कमा आएका छन् भने उनकी २८ वर्षीया श्रीमती बिना ऐरी र पाँच वर्षीया छोरी दिपिका ऐरी सम्पर्कविहीन छन्।
सिद्धकुमाख गाउँपालिका–४ मेलाचौरका ३१ वर्षीय हिरालाल घर्ती मगर, कुमाख गाउँपालिका–३ गुरुवासेका ६० वर्षीय दुर्गाबहादुर राना, ४३ वर्षीय नमप्रकाश राना, ४० वर्षीय गणेश राना, २५ वर्षीय नवीन राना, ५५ वर्षीय ड्यासे राना, १७ वर्षीय नन्दराम राना र २४ वर्षीय चित्रबहादुर राना पनि सम्पर्कविहीन छन्।
कुमाख–१ भितिवनका ५० वर्षीय खुर्सल राना र सोही वडाको साधनमुढाका ४५ वर्षीय शेरबहादुर विक भने सम्पर्कमा रहेको प्रहरीले जनाएको छ।
शारदा नगरपालिका–१३ सल्लेरीका ३२ वर्षीया प्रमिला बुढाथोकी, २८ वर्षीया लक्ष्मी बुढाथोकी, १७ वर्षीय प्रविण बुढाथोकी, ३९ वर्षीया रिता बुढाथोकी र ४४ वर्षीय रिमबहादुर बुढाथोकी पनि सम्पर्कविहीन छन्।
त्रिवेणी गाउँपालिका–५ का प्रेम महतरा, पोषण महतरा, रुपलाल विक, निमकुमार विक, लालसिंह विक र प्रकाश विक सम्पर्कविहीन रहेको विवरणमा उल्लेख छ।
कपुरकोट गाउँपालिका–६ का हिमलाल सार्की, रामबहादुर सार्की, तिलक सार्की, किरण विक, मानबहादुर विक, लालबहादुर विक, प्रकाश सार्की, लक्ष्मण सार्की, भिमबहादुर ठकुरी, खिमबहादुर दमाई र टेकबहादुर बस्नेत पनि सम्पर्कविहीन छन्।
त्यस्तै त्रिवेणी गाउँपालिका–४ का २४ वर्षीय मोहन रेउले, त्रिवेणी–५ का २५ वर्षीय रोहित बुढाथोकी तथा कालीमाटी गाउँपालिका–३ का ३८ वर्षीय भुपेन्द्र रावत र ४५ वर्षीय भुपेन्द्रबहादुर खत्री पनि सम्पर्कविहीन रहेको प्रहरीले जनाएको छ।
रुकुम पश्चिमका १४ जना सम्पर्कविहीन
रुकुम पश्चिमबाट पनि १४ जना बेपत्ता रहेको खबर आएको छ। जिल्ला प्रहरी प्रमुख डीएसपी बेदबहादुर पौडेलका अनुसार स्थानीयले जिल्लाका १६ जना व्यक्ति सम्पर्कविहीन रहेको जानकारी दिएका थिए। तीमध्ये दुई जना भने सम्पर्कमा आएका छन्।
प्रहरी निरीक्षक झविन्द्र परियारका अनुसार सम्पर्कविहीन भनिएका पाँच जना रुकुमबाट बसाइँ सरेर बर्दिया गएको भन्ने जानकारी पनि आएको छ। त्यसबारे प्रहरीले थप अनुसन्धान गरिरहेको जनाएको छ।
रुकुम पूर्वका तीन जना सम्पर्कविहीन
रुकुम पूर्वको भूमे गाउँपालिका–३ घर भई रसुवामा कार्यरत प्रहरी जवान मिलन श्रेष्ठ पनि बाढीपछि सम्पर्कविहीन छन्। जिल्ला प्रहरी प्रमुख डीएसपी खुमानन्द पाण्डेका अनुसार भूमे–३ का थप एक जना र सिस्ने गाउँपालिका–४ का एक जना गरी जिल्लाका तीन जना सम्पर्कविहीन रहेको परिवारले जानकारी दिएका छन्।
रोल्पाका ५ देखि ६ जना सम्पर्कविहीन
रोल्पाका प्रहरी प्रमुख डीएसपी पञ्चकुमार बाखुका अनुसार जिल्लाका ५ देखि ६ जना व्यक्ति रसुवाको बाढीपछि सम्पर्कविहीन रहेको भन्दै आफन्तले प्रहरीलाई जानकारी गराएका छन्। प्रहरीले उनीहरूबारे थप विवरण संकलन गरिरहेको जनाएको छ।
प्यूठानका तीन जना सम्पर्कविहीन
प्यूठानका प्रहरी प्रमुख डीएसपी नरहरि अधिकारीका अनुसार जिल्लाका तीन जना व्यक्ति रसुवाको बाढीमा परी बेपत्ता भएको भन्दै स्थानीयले प्रहरीलाई जानकारी गराएका छन्। प्रहरीले उनीहरूको अवस्थाबारे जानकारी लिने र विवरण पुष्टि गर्ने काम भइरहेको जनाएको छ।
रसुवाको भोटेकोशीमा बुधबार बिहान आएको भीषण बाढीले सीमा क्षेत्र तथा आसपासका क्षेत्रमा ठूलो क्षति पुर्याएको छ। बाढीमा परी नेपाल र चीनतर्फ मानवीय क्षति हुनुका साथै ठूलो संख्यामा मानिस सम्पर्कविहीन भएका छन्। उद्धार तथा खोजी कार्य जारी रहेकाले सम्पर्कविहीनको संख्या अझै बढ्न सक्ने अधिकारीहरूले बताएका छन्।
