रसुवा–त्रिशूली करिडोरमा आएको बाढीले सार्वजनिक यातायातको क्षेत्रमा ठूलो क्षति पुर्याएको छ।
यात्रुवाहक तथा मालवाहक सवारीसाधनमा व्यापक क्षति हुनुका साथै चालक, सहचालक र सवारी मजदुरसमेत सम्पर्कविहीन अवस्थामा रहेको नेपाल यातायात व्यवसायी राष्ट्रिय महासंघले जनाएको छ।
महासंघका अध्यक्ष पुण्यप्रसाद सिटौलाले बाढीबाट सार्वजनिक सवारीमा पुगेको क्षतिको यकिन विवरण प्राप्त भइनसकेको बताए।
उनका अनुसार महासंघको आपतकालीन कार्यसमिति बैठकले बाढीबाट क्षति पुगेका सवारी साधनको विवरण संकलन गर्न केन्द्रीय कोषाध्यक्ष राजेन्द्र आचार्यको संयोजकत्वमा पाँच सदस्यीय समिति गठन गरेको छ।
सिटौलाका अनुसार नेपाल अरनिको यातायात सेवा प्रालिका मानसरोवर यात्रामा गएका तीर्थयात्री बोकेका २५ वटा बसको अवस्था अहिलेसम्म अज्ञात छ।
बससहित तीर्थयात्री र ५० जना कर्मचारी समेत सम्पर्कविहीन रहेको बताए।
त्यस्तै नमस्ते पासाङ ल्हामु यातायात कम्पनी प्रालिका पनि १५ वटा सवारी साधन र तिनमा सवार यात्रुको अवस्थाबारे कुनै जानकारी प्राप्त हुन नसकेको बताए।
अहिलेसम्मको जानकारी अनुसार मानसरोवर जाने तीर्थयात्री बोकेका कुल ४० गाडी सम्पर्कविहीन भएको महासंघले जनाएको छ।
- न्युज एजेन्सी नेपाल
.JPG)
