टिचिङ अस्पताल महाराजगन्जको आपतकालीन कक्षबाहिर एक युवती फोनमा भक्कानिँदै कुरा गरिरहेकी थिइन्, 'हाम्रो मान्छेको न सास छ, न लास!'
छेउमा अर्का एक युवक पनि हतास मुद्रामा फोनमा कुरा गर्दै थिए।
मैले आफ्नो परिचय दिएपछि युवतीले रूँदै आफ्नो व्यथा पोख्न थालिन्।
ती युवती थिइन्– गुराँस तामाङ। र, छेउमा रहेका युवक– ईश्वर थपलिया।
काठमाडौंको एक अनलाइन स्टोरमा काम गर्ने गुराँसका साथी सन्तोष थपलिया रसुवाको मैलुङस्थित निर्माणाधीन दुसान जलविद्युत आयोजनामा गाडी चलाउँथे।
बुधबार दिन बिहान साढे ७ बजे मात्र उनीहरूबीच भिडिओ कलमा कुरा भएको थियो।
'हामी सर्भिया जाने तयारीमा थियौं, त्यसकै लागि शुक्रबार मेडिकल गर्ने समय पनि लिइसकेका थियौं। तर हिजो एक्कासि यस्तो भइदियो,' आँसु पुछ्दै गुराँसले भनिन्, 'उहाँको अहिलेसम्म कुनै अत्तोपत्तो छैन। कसैले के भन्छन्, कसैले के। मन साह्रै आत्तिएको छ।'
सन्तोषका भाइ ईश्वरका अनुसार दाजुको अवस्थाबारे फरक फरक सूचना आइरहेका छन्। कसैले बजारमा सामान किन्न जाँदा गाडीसहित बगाएको भन्छन् त कसैले सुरूङभित्र फसेको भन्छन्।
'सुरूङभित्रै ३ सय जना फसेका छन् रे! त्यहाँ पानी नपसेको भए अझै आशा बाँकी रहन्थ्यो कि!' ईश्वरले भने, 'अस्पताल ल्याइएका घाइतेहरूसँग कुरा गर्न पाए केही थाहा हुन्थ्यो, तर हामीलाई भित्र जान र बुझ्न दिइएको छैन।'
हराइरहेका सन्तोष थपलिया।
दोलखा घर भएका सन्तोष र ईश्वर दुई भाइ हुन्। उनीहरुका आमाबुबा दुवै गाउँमै छन् भने ईश्वर भक्तपुरमा श्रीमतीसँग बस्छन्।
ईश्वर र गुराँसजस्तै हराइरहेका आफन्तको खोजीमा दर्जानौं परिवार टिचिङ अस्पतालमा भौंतारिइरहेका छन्। कोही भित्तामा हराएका आफन्तको फोटो टाँस्दै छन्, कोही आपसमा अँगालो मारेर भक्कानिइरहेका छन् त कोही प्रहरी सहायता कक्षमा नाम टिपाउन तँछाडमछाड गर्दै छन्।
प्रहरीका अनुसार हराएका आफन्तको नाम टिपाउनेको संख्या झन्डै ८ सय पुगिसकेको छ।
मकवानपुरका दीपक गजुरेल आफ्ना ५२ वर्षीय ससुरा राजनप्रसाद पौडेलको फोटो बोकेर अस्पताल परिसरमा भौंतारिँदै थिए।
राजन रसुवाको नयाँपुलस्थित 'फेवा कन्स्ट्रक्सन थिब्री' मा सेक्युरिटी गार्ड थिए।
'बाढीले ससुराली घरै सोहोरेर लग्यो। सासूलाई पनि बगाएको थियो, तर उहाँ भाग्यवश बाँच्न सफल हुनुभयो। उहाँलाई काठमाडौं ल्याउने प्रयास भइरहेको छ,' दीपकले भने, 'मेरो जेठान नवराज पौडेल खोजीका लागि गाउँ जानुभएको छ। म भने यता अस्पतालमा भेटिनुहुन्छ कि भनेर आएको हुँ। अब अरू अस्पताल पनि धाउँछु।'
मकवानपुरकै थाहा नगरपालिकाबाट मात्र २० जना हराइरहेको भन्दै सुमन स्याङ्तान र अजय मोक्तान पनि टोली बनाएर अस्पताल आइपुगेका थिए।
सुमनका नातेदार दाइहरू हिरा लामा र टीकालाल लामा गाडी चालक हुन्, जो सीमाना नजिकैबाट सम्पर्कविहीन भएका छन्। अजयका भान्जा सुदीप वाइबा पनि सवारी चालक नै हुन्।
'थाहा नगरबाट मात्रै २० जना हराइरहेका छन् भन्ने खबर पाएका छौं, अरू पनि हुन सक्छन्। हामी सबैको खोजीमा भौंतारिइरहेका छौं,' सुमन र अजयले भने।
उनीहरूले बोकेको सूचीमा सुदीप वाइबा, प्रशान्त कार्की, विजय बलामी, मिलन (सूर्य) गोपाली, सोनाम गोले, सुदीप कार्की, रामेश्वर लामा, हिरा लामा, रेलबहादुर अधिकारी, राजु बल, राजु तामाङसहित १७ जनाको नाम र फोटो थियो।
बाढीपहिरोका घाइतेमध्ये धेरैको उपचार टिचिङ अस्पताल र राष्ट्रिय ट्रमा सेन्टरमा भइरहेको छ।
टिचिङ अस्पतालका प्रवक्ता डा. गोपाल सेढाईंका अनुसार त्यहाँ उपचारका लागि ३१ जना ल्याइएकोमा ६ जनाको आइसियूमा उपचार भइरहेको छ भने एक जनाको मृत्यु भएको छ। बाँकीमध्ये केहीको सामान्य वार्डमा उपचार भइरहेको छ भने केही डिस्चार्ज भइसकेका छन्।
यता, राष्ट्रिय ट्रमा सेन्टरमा २९ जना भर्ना भएकामा १३ जना उपचारपछि घर फर्किएका छन्। हाल एक जनाको आइसियूमा, एक जनाको एचडियूमा र १३ जनाको साधारण वार्डमा उपचार भइरहेको सेन्टरका निर्देशक सह-प्राध्यापक डा. रूद्र मरासिनीले जानकारी दिए।
