रसुवाको भोटेकोशी नदी क्षेत्रमा पुनः लेदोसहितको बाढी बढे पनि माथिल्लो भेगमा नदी थुनिएर बनेको ताल स्थिर रहेको चिनियाँ पक्षले जनाएको छ।
बुधबार बिहान बाढी आएको रसुवाको भोटेकोशी क्षेत्रमा पुनः लेदोसहित पानीको बहाव बढेपछि नेपालले चिनियाँ पक्षसँग कुरा गर्दा उनीहरूले उक्त जबाफ दिएका हुन्।
'पानीको बहाव बढेको छ। तल्लो तटीय क्षेत्रमा यसअघि हिम-पहिरो (बर्फ र चट्टान) खसेको थियो। तर नदी थुनिएर ताल बनेको माथिल्लो क्षेत्र स्थिर देखिन्छ। अहिले तत्कालै ताल फुटेर ठूलो बाढी आउने जोखिम छैन,' चिनियाँ पक्षलाई उद्धृत गर्दै परराष्ट्र मन्त्रालय स्रोतले सेतोपाटीसँग भन्यो।
स्रोतले अगाडि भन्यो, 'पानी बढिरहेको छ र तालको आकार ठूलो हुँदै गएको छ। पानी निरन्तर 'ओभरफ्लो' पनि भइरहेको छ, तर कुनै ठूलो विष्फोट वा फुटेको अवस्था छैन।'
चिनियाँ पक्षले स्थितिमाथि निगरानी राखिरहेको र थप जानकारी प्राप्त हुनासाथ उपलब्ध गराउँछौं भनेको स्रोतले बतायो।
यसअघि बाढी पूर्वानुमान महाशाखाले शुक्रबार दिउँसो १२:३१ बजे सूचना जारी गर्दै भोटेकोशीमा बाढी बढिरहेको र बाढी स्याफ्रुबेसीसम्म आइपुगेको जनाएको छ।
'भोटेकोशी नदी रसुवामा बाढी बढिरहेको र बाढी स्याप्रुबेसीसम्म आइपुगेको हुँदा त्रिशूली नदीको तटिय क्षेत्र (मुग्लिनसम्म) अर्को सूचना नआउँदासम्म उच्च सतर्कता सहित सुरक्षित स्थानमा रहन अनुरोध छ,' महाशाखाले भनेको छ।
राष्ट्रिय विपद जोखिम न्यूनीकरण तथा व्यवस्थापन प्राधिकरणले पनि शुक्रबार विज्ञप्ति जारी गर्दै यही भदौ १० गते भीषण बाढी आएकै क्षेत्रमा पुनः लेदोसहितको पानीको बहाव केही बढेको सूचना प्राप्त भएको जनाएको छ।
माथिल्लो क्षेत्रमा लेदो बढेकाले पुनः थप बाढी आउन सक्ने जोखिम कायमै रहेको प्राधिकरणले स्पष्ट पारेको छ।
प्राधिकरणका उपसचिव एवं प्रवक्ता शान्ति महतद्वारा हस्ताक्षरित सूचनामा भोटेकोशी तथा त्रिशूली नदी किनारमा उद्धार र राहत कार्यमा खटिएका सुरक्षाकर्मी, स्वयंसेवक तथा विविध कारणले जोखिमपूर्ण क्षेत्रमा रहेका सर्वसाधारण सबैलाई उच्च सतर्कता अपनाउन भनिएको छ।
साथै, नदी किनार र आसपासका सम्भावित जोखिम क्षेत्रमा रहेका मानिसहरूलाई खतराको अलिकति पनि संकेत देखिएमा तुरून्त सुरक्षित स्थानतर्फ जान विशेष अनुरोध गरिएको छ।
यसअघि नेपाल प्रहरीले तिब्बततर्फ पुन: ड्याम फुटेको सूचनापछि तटीय क्षेत्रमा सुरक्षित रहन अनुरोध गरेको थियो।
'तिब्बततर्फ पानीको ड्याम पुन: फुटेको जानकारी प्राप्त भएको हुँदा उद्धार तथा राहत कार्यमा खटिनुभएका सम्पूर्ण सुरक्षाकर्मी, उद्धारकर्मी तथा सर्वसाधरणहरूलाई तत्काल सतर्क रहन र सुरक्षित स्थानतर्फ जान/जानकारी गराउन अनुरोध छ,' प्रहरीले भनेको छ।
नेपाली सेनाका प्रवक्ता एवं सहायक रथी राजाराम बस्नेतले पनि हेलिकप्टरबाट रेकी गर्ने काम भएको बताए।
भदौ १० गते भोटेकोशीमा आएको भीषण बाढीका कारण रसुवासहित तल्लो तटीय क्षेत्रमा व्यापक जनधनको क्षति भएको थियो। बाढीका कारण रसुवा, नुवाकोट, धादिङ लगायतका जिल्ला प्रभावित भएका थिए। सुरक्षा निकायहरूले ती ठाउँमा उद्धारका कार्य गर्दै आएको छ।
-1787828085.jpeg)
