तुलसीपुर उपमहानगरपालिकाले बिनाशकारी भोटेकोशी बाढीमा परी मृत्यु तथा बेपत्ता भएका आफ्नो नगरबासीका परिवारलाई आर्थिक सहायताका साथै उनीहरूका सन्तानलाई नि:शुल्क पढाउने भएको छ।
उपमहानगरपालिकाको ५२ औं कार्यपालिका बैठकले भोटेकोशी बाढीमा परी मृत्यु भएका तथा बेपत्ता भएका व्यक्तिका परिवारलाई जनही एक लाख रुपैंयाँका दरले राहत स्वरूप नगद उपलब्ध गराउने निर्णय गरेको हो।
बैठकले बाढीमा परी मृत्युवरण गरेका तथा बेपत्ताका सन्तानका हकमा १२ कक्षासम्म नि:शल्क पढाउने जिम्मेवारी पनि लिने भएको छ।
मेयर टीकाराम खड्काका अनुसार भोटेकोशीको विनाशकारी बाढीमा परी ज्यान गुमाएका तथा बेपत्ता परिवारका सदस्यलाई प्रतिव्यक्ति एक लाख रुपैयाँका दरले नगद राहत उपलब्ध गराउने तथा उनीहरूका सन्तानलाई कक्षा १२ सम्म नि:शुल्क पढाउने निर्णय बुधबार बसेको कार्यपालिका बैठकले पारित गरेको हो।
राज्यले मृत्यु भएको घोषणा गरेपछि तथा बेपत्ताको हकमा पनि अब उनीहरू सशुकल वा ज्युँदो फर्किन सम्भव छैन भन्ने पुष्टि गरिसकेपछि घोषित राहत रकम पीडित परिवारलाई उपलब्ध गराइने मेयर खड्काले बताए।
त्यस्ता व्यक्तिका बालबालिका हाल जो–जहाँ अध्ययनरत छन् र भविश्यमा पनि उनीहरूकै रूचि अनुसार उनीहरूको शिक्षामा अवरोध सृजना हुन नपाओस् भनेर तत्काल उनीहरूको खर्च सबै उपमहानगरले नै बेहोर्ने निर्णय भएको मेयर खड्काले बताए।
‘हामीले शिक्षाको क्षेत्रमा डेढ करोड छुट्याएका छौं,’ मेयर खड्काले भने, ‘अभिभावक बाढीमा परी मृत्यु वा बेपत्ता भएपछि त्यो अभिभावकीय दायित्व अब हामीले लिने निर्णय गरेका हौं।’
त्यस्त बालबालिकाको शिक्षाको लागि यो एक वर्ष मात्रै नभई १२ कक्षासम्म उनीहरूले रोजेको विद्यालय र चाहेको विषय जे पढे पनि लाग्ने सबै खर्च उपमहानगरपालिकाले नै बेहोर्ने निर्णय गरिएको मेयर खड्काले बताए।
‘भोटेकोशी बाढीको प्रभाव तथा असर लामो समय रहन सक्छ,’ उनले भने, ‘तर, सरकारले अब फेला नपरेकाहरुका हकमा पनि छिटो निर्णय गर्न जरूरी छ। जसबाट उनीहरूको पीडामा थोरै भए पनि मल्हम पट्टी लगाउन हामीले सकौं।’
-1746009348.jpg)
