प्रधानमन्त्रीका प्रमुख सल्लाहकारको नाम तथा पद दुरुपयोग गरी इसराइलमा केयर गिभरका रूपमा पठाइदिने भन्दै २ करोड ५० लाख रुपैयाँ ठगी गरेको आरोपमा नेपाल प्रहरीले दुई जनालाई पक्राउ गरेको छ।
नेपाल प्रहरीको केन्द्रीय अनुसन्धान ब्युरो (सीआईबी)ले रामेछाप सुनापति गाउँपालिका–१ का ५९ वर्षीय भरत चौलागाईं र दोलखा कालिञ्चोक गाउँपालिका–८ की ३२ वर्षीया बालिका सिवाकोटी पक्राउ गरेको हो।
नेपाल सरकार र इसराइल सरकारबीच भएको सरकार–सरकार (जीटूजी) सम्झौताअनुसार सन् २०२४ मा इसराइलमा केयर गिभरका लागि कामदार पठाउन परीक्षा सञ्चालन गरिएको थियो।
उक्त परीक्षामा सहभागीमध्ये इसराइल जान छनोटमा नपरेका १५६ जनालाई चौलागाईं र सिवाकोटीलगायत व्यक्तिले प्रधानमन्त्रीका प्रमुख सल्लाहकारको नाम तथा पद दुरुपयोग गरी इसराइल पठाइदिने भन्दै विश्वासमा पारेको प्रहरीको भनाइ छ।
प्रहरीका अनुसार उनीहरूले प्रतिव्यक्ति ६ लाख २० हजार रुपैयाँका दरले रकम लिएर जम्मा २ करोड ५० लाख रुपैयाँ ठगी गरेको भन्दै पीडितहरूले जाहेरी दिएका थिए।
जाहेरीका आधारमा प्रहरीले दुवै जनालाई भदौ १ गते पक्राउ गरेको हो।
उनीहरूमाथि मुलुकी अपराध संहिता, २०७४ को ठगीसम्बन्धी कसुरमा काठमाडौं जिल्ला अदालतबाट म्याद थप अनुमति लिएर थप अनुसन्धान भइरहेको सिआईबीले जनाएको छ।
-1746009348.jpg)
